其實生小朋友之後都深知道，會有好多無謂人畀無謂意見，好多時聽完都係得啖笑。但有一樣歷久不衰嘅無謂嘢，就係比賽小朋友食幾多飯！如果在場有多過一個小朋友，一定會有人跳出嚟講「邊個食得多啲叻啲」，或者「邊個食得咁少，好差」！
有媽媽喺forum度分享話次次去某親戚屋企食飯，都會話佢小朋友食得少，真係「太差」、「有排都追唔到」、「一定輸」。搞到小朋友因為唔想畀人話係輸家而想食多啲。唔好意思，原來養緊豬呀而家？小朋友食得飽夠營養咪得囉，食滯咗咪仲衰！重點係呢樣嘢我做女時已經聽過，到今時今日仲講緊，老唔老土啲呀。
雖然都明老一輩想氹細路哥食多啲飯，望佢快高長大。但大佬呀，你而家唔係叫「氹」囉，係打擊緊佢自信心呀！同埋咩叫「叻」啫？拎住個咁虛無嘅概念去同小朋友講根本冇意思，今次話唔食晒碗飯唔叻、下次話唔收玩具唔叻，再下次點點點又唔叻喇喎？咁唔係教佢，係要挾佢囉好冇。
其實大人小朋友都一樣，要讚得具體先有用架嘛。好似「你今次有認真食飯，媽咪覺得你做得好好」，小朋友先知道點樣做叫做啱，而唔係活喺郁啲畀人話「唔叻」嘅恐懼感之中。遇到呢啲無謂人，唯有自己同小朋友講清楚：你唔會因為食得唔夠人多，而變得唔叻！（媽呀，真係好老土！）
