日本創意無限，無論家品或者日用品都花盡心思，升呢做咗父母嘅你，又有無諗過原來日本文具店係旅遊時值得一逛嘅好去處？
當地設計師每年推出不同形式超貼地產品，當中有實用亦有千奇百趣，而每年都會舉行嘅日文具大賞（文房具屋さん大賞）仲搜羅當地重點文具；正為小朋友準備開學嘅家長們，依家就一齊嚟睇下2019日本文具節有咩必入創意產品啦！
更多閱讀：
1)［總大賞］GLOO 方形漿糊筆 (日文：GLOOスティックのり)
獲得大賞嘅呢支方型漿糊筆，睇落實而不華，但佢嘅出現就不禁令人反思點解每次用漿糊筆都搽唔到條邊，點解明明噤方便嘅產品，就偏偏搽到一手係先搽到個邊位，點解一開始漿糊筆會係圓型設計！
方形設計仲可以避免用嘅時候周圍碌，乖乖地企喺度陪你做勞作，如果去到日本，千祈唔好錯過進入日本文具店大手入貨！
2)［創意賞］Kanmido紙膠帶隨身筆 maco (日文：ペンサイズのマスキングテープホルダーmaco)
呢支由Kanmido出品嘅「紙膠帶隨身筆 maco（ペンサイズのマスキングテープホルダーmaco）」，除咗外型令人一見傾心之外，而且體積不大，只需要一支筆嘅空間，就可以將靚靚紙膠帶帶出街，而且筆身設有貼心嘅切割口，方便撕貼；如果溫習嘅時候，可以有佢幫忙記錄重點，真係溫書都開心啲啦！
3)［筆袋賞］SONiC 直立式筆袋SMA·STA pen-case (日文：スマ・スタカーム 立つペンケース)
筆袋係每個學生嘅必備產品，而且花式眾多，揀起上來真係幾傷頭腦，SONiC 直立式筆袋有多種使用方法，而且容量特大，內含夾層可放置小物，而重點係佢底座加強不易傾倒，可以變身筆筒之外，仲可以當手機置物座添，真係一物多用！
4)［擦膠賞］Zi磁石集屑型擦膠 (日文：磁ケシ)
細個嗰陣有無成日比阿媽鬧擦到一屋擦膠碎？當時你個心又有無諗：「又要寫靚啲，又唔擦得咁點搞呀？」，到依家做咗人父母，你又開始感受到擦膠碎嘅威力未？如果「擦膠碎」已經成為你嘅困擾，呢款KUTSUWA出品嘅擦膠就一定幫到你！其實呢舊擦膠並唔係有咩魔法，只係運用咗磁力相吸嘅原理，以磁鐵機關將含磁性鐵粉嘅擦膠全部吸走。
5)［收納賞］SMART FIT ALTNA 流動文具架 (日文：SMART FIT ALTNA キャリングプレート)
榮獲收納賞嘅SMART FIT ALTNA 流動文具架誕生，可以話係大頭蝦嘅大朋友、小朋友救星，佢清楚嘅間格，除咗可以一睇就知啲嘢喺邊，唔使每次搵嘢嘅時候都好似大海撈針咁，仲可以提醒自己有邊個窿窿嘅嘢無帶齊，解決帶漏嘢、執漏嘢嘅問題。
更多閱讀：【開學系列】 開學日到啦！N個幫助孩子收拾心情的好辦法
部份圖片來源：instagram
