妊娠糖尿唔駛怕

相信每個懷孕媽媽都聽過飲糖水，大家都非常恐懼，趙c9早喺17週就經歷左（下篇先再同大家講咩人要飲，飲既過程）其實趙c9飲之前都覺得自己會中，結果當然係中喇入院檢查後就開始餘下孕期「吉手指」既生涯。

其實「吉手指」即係測試血液中既含糖指數，太低或者太高當然都唔好，通常餐前餐後測試係最理想，因為可以了解前後既差別（趙c9係聽取醫生建議，每星期揀兩日做測試，每日量7次，三餐前後＋瞓教前一次），但有時我都想知道食完某啲野會唔會特別高，我都會照測。

測試只需要血糖機、試紙、採血筆、採血針、消毒紙巾（通常係套裝咁買）而亦只需要1微升血量就可以（真係一小滴就夠）採血只會喺手指末端採，通常選用食指、中指、無名指，三隻手指其中一隻，因為呢三隻指尖兩側既神經線較少，可以減輕痛楚感，但對於趙c9其實真係一啲都唔痛。

提一提，每支採血針都有分度數，皮膚越厚，需要度數就越大，但建議大家有1度試起，咁樣就可以減低痛楚！

而血糖值方面，每間醫院、診所既指數都會有少少唔同，一般餐前4-6mmol/L，餐後6-7mmol/L，如果太高，就要控制下飲食，做下運動，當然如果控制飲食都唔得，就有可能要注射胰島素喇，但為左bb同自己，有無驗到妊娠糖尿，大家都要注意飲食呀！

檢測血糖既步驟：

Step1：洗淨雙手，以酒精濕紙巾清潔指頭

Step2：將血糖試紙及採血針裝好

Step3：將裝好有採血針既採血筆對準指頭側邊，按下按鍵感覺到針刺即可(記住採血筆可調教採血力度)架

Step4：按壓手指頭，由指根推向指尖，擠出血液

Step5：將血液沾於試紙之上，靜待結果（約5-6秒）