小包媽孕記之公院開刀生產記

冬甩妹妹早兩個星期終於出左世啦～ 今次包媽係直接安排開刀生～

包媽早一日就要入院做手術前準備，例如見產科同麻醉科醫生，抽血配血等等～ 入院當日見醫生問關於陪產嘅事，先知原來係要一早request ga！即係當初俾開刀期已經要request，而醫生係唔會主動問你想唔想陪產，不過即使要求左，都要睇麻醉科醫生決定情況適唔適合俾爸爸入去陪產～ 因為我入院先要求，所以更加不確定有冇得陪，但姑娘都叫爸爸先睇左dvd有關陪產嘅資料，到開刀前再睇下麻醉科醫生批唔批准。跟住就係捱左一個禁水禁食嘅夜晚～

到左開刀果朝早，唔知係緊張定咩，插完尿喉就keep住好想去廁所但又去唔到… 搞到個人勁唔舒服又標冷汗咁… 真係勁辛苦… 仲要得到個壞消息，爸爸冇得入去陪產… 心情更加緊張… 坐係輪椅等緊入手術室嘅我真係講左勁多次好驚好緊張… 到入到手術室開始打麻醉，藥力開始發作先冇咁驚，事關包媽對麻醉藥反應都大，個人震得好緊要，震到個人好似想抽筋咁，仲想作嘔，所以已經唔識驚，只係知要頂住，同左麻醉科醫生講自己點唔舒服，再等醫生較好啲藥，先叫冇全程都震得咁辛苦咋～

今次嘅手術感覺比生小包哥哥果陣耐好多～ 好似俾人搖左好耐搞左一大輪，妹妹先出到黎咁～ 雖然麻醉左但一路都因為副作用個人係處於好唔舒服嘅狀態，直到聽到妹妹嘅喊聲，即刻鬆左一口氣咁～ 明知仲要等縫合傷口，但個人已經覺得有任務成功嘅感覺～ 不過縫傷口係漫長嘅，由妹妹出世到手術完成，已經係成個鐘之後嘅事～ 唔知係而家制度update左定因爲當年生小包係緊急開刀嘅關係，今次推左我去恢復房觀察嘅時候，竟然有得同妹妹有肌膚接觸嘅時間！仲可以即時餵母乳tim！雖然麻醉藥未過個人仲有啲唔舒服，但可以咁快同妹妹接觸真係好開心，妹妹仲好叻識自己爬過去揾奶食tim！

甜蜜嘅時光過得好快，番到上產後房先係惡夢嘅開始… 話說麻醉科醫生已經叮囑我上到病房就要食止痛藥，唔到等麻醉藥過左覺得痛先食，因為開第二次刀會比第一次痛得多… 點知我恢復房等左好耐都未上到產後房，再加上上到房之後啲藥又遲左先到… 中間等藥嘅時間真係生不如死… 成個傷口係火燒咁，包媽自問都算忍得痛，都就黎揸爛個床欄咁滯係度典黎典去… 跟住終於等到藥黎又發現冇倒定水，得杯滾水都要夾硬飲少少黎吞果粒止痛藥… 冇燙傷條脷真係好彩… 直到藥力開始發作，先幫忙減輕到些少痛楚，中間呢兩個幾鐘真係痛到覺得自己又再一次來回地獄又折返人間…

呢幾日係醫院住，最辛苦其實除左傷口痛同訓得唔好之外，作為二胎媽媽最辛苦就係心入面最掛住大果個～ 所以到我落到床，小包又跟爸爸黎左醫院果陣，我都會同姑娘講我出病房出面見下小包～ 不過好明顯佢已經習慣左呢幾日媽媽唔係身邊，就算我要番房都肯同我byebye～ 証明哥哥都大個仔左，可以稍為減少對媽媽嘅依賴啦～ 到第四日，檢查一切正常，我地就一家四口一齊番屋企lu～

今次生完其實仲有彩蛋ga！話說生完上產後房，我都估計會去番當年生小包果區嘅病床，因為開刀媽媽主要都集中係同一區嘅，但估唔到我又被分配番當年嘅4號床！真係好巧合丫！