2018-11-19

3.9K

【一句話足以令母乳媽媽崩潰】支持餵哺母乳!乳房護理你要知

近年專心瑜伽事業嘅Coffee(林芊妤)榮升人母之後,修身速度同成績真係令唔少人羨慕又妒忌,呢位新潮媽媽近日就上載咗張餵緊母乳嘅相,hashtag #母乳媽媽 ,不過就有部份人覺得咁樣過於暴露。

圖片來源:Coffee Lam(林芊妤)Facebook,網民稱過於暴露。

鯊太太今日就唔係要做咩網絡判官,只係有感而發,既然談論緊#母乳媽媽,不如都畀多少少支持身邊嘅母乳媽媽啦!餵哺母乳本身已經係件相當艱巨嘅事,回想產後嗰陣,情緒真係極難控制。淨係講夠唔夠母乳問題,就已經夠晒崩潰。當時一聽到啲疑似影射說話,「會唔會唔夠營養? 」、「唔夠唔好堅持餵啦! 」,無論對方係出於好意、關心,定只係唔識問下,都好似一把一把刀咁飛埋嚟咁,好容易亂諗嘢。母性大到將自身護理都忽略埋,惡性循環又影響返情緒同奶量,嘩,真係好複雜......

其實喺懷孕期同餵哺期乳房護理都係非常重要,妥善護理唔單止可以保持泌乳暢順,仲可以維持胸型,為自己同寶寶都帶嚟更好嘅影響!下面就係鯊太太為母乳媽媽搜集嘅小貼士啦~

【懷孕初期小貼士】

由受孕嘅第一日開始,媽媽嘅身體已經開始改變,為小寶寶做好準備。孕期前三個月體內賀爾蒙變化會令乳房變得緊繃、飽滿,乳腺同脂腺亦會開始擴張,呢個時候阿連(乳頭)可能變得柔軟敏感,都有龜裂或者腫脹嘅可能。

媽媽有咩可以做:


  • 買返啲啱尺吋嘅胸圍,盡量選擇棉質同有軟墊,並避免有鋼圈,因為鋼圈可能會阻礙乳管,影響母乳分泌;

  • 注意阿連保濕,可以使用保濕霜,防止乾燥感。
    (鯊太太推介:Philips AVENT嘅乳頭滋潤保護霜,用純度極高的羊毛脂製成,可以全面滋潤到皮膚外層,孕期後段同餵哺期都可以繼續使用,前期幫助阿連做好餵哺準備,後期為阿連作出保護,最緊要成份天然對鯊寶無害嘛!)


【餵哺期乳房護理小貼士】

喺懷孕同餵哺期間,身體為咗預備分泌乳汁,乳房會變得又大又重,表面皮膚都隨時間受到拉扯;乳房腫脹同發炎仲可能會導致乳房變形。

媽媽有咩可以做:


  • 適當喺餵哺前後配合熱敷同冰敷就可以舒緩乳房壓力,有效避免形成乳腺炎;

  • 冰敷可以協助舒緩痠痛及乳房腫脹;

  • 熱敷能夠刺激乳汁分泌。


【餵哺母乳飲食小貼士】
喺飲食方面,媽媽們可以食多啲:

  • 全麥穀片;

  • 蔬果;

  • 綠色蔬菜;

  • 含維他命B(蛋、魚、家禽)食物;

  • 含同維他命E(堅果、綠葉蔬菜)嘅食物,幫助維持肌膚彈性同色澤。


資料參考:Philips AVENT

【編按:以上內容為作者之個人意見及立場】

相關文章

緊貼新冠肺炎最新相關資訊