這個世代大多數媽媽都係「雙職媽媽」，可以說係一件最普通不過嘅事。雙職媽媽在辦公室要面對工作壓力；在家要面照顧發管教小B們，當中嘅壓力真係不容忽視，亦不能掉以輕心，以免令壓力越積越多而變成情緒病。
前陣子，小JM媽媽亦有點鬧情緒，似乎感覺到係壓力開始快要爆發，突然感到上班就有如一件痛苦嘅事，或者係因為工作上嘅壓力突然增加嘅關係，令到媽媽我有點想要放棄職場嘅生活，想要學習成為一位「全職媽媽」。
但永遠「想像」同「現實」都係兩個模樣，而現實總係殘酷嘅。每當日復日被可惡嘅上司折騰嘅時候，真係巴不得想要拋下一句：「我唔做啦！」但可惜內心總會有一把聲音幽幽的提醒我，要我按捺一下。
其實打從懷孕開始，雙職媽媽也面對著各樣前所未見嘅問題或障礙，有時真係難免會令媽媽們感到有點氣餒。
就小JM媽媽而言，打從懷孕起就已經要面對很多不同的挑戰。
懷孕時期：
只要精神稍遜、記憶轉差就會變成焦點人物／產生焦點問題，無謂人同事／上司會說：
「點解你成日都無理精神嘅？」
「點解你好似成日唔夠瞓嘅？」
「你記唔記得＿＿＿？我之前同咗你講架呢。」
（心想：其實唔係重要野我係唔會Mark低囉真係！廢話！滾開！）
其實懷孕後，孕媽們嘅精神和體力已經不比從前，很容易就會覺得攰，或者需要休息，甚至乎有些孕媽會開始出現「無記性」嘅一面。
孕媽想要申請病假、休假嘛？！刁難嘅說話真可多：
「你檢查完下晝返工得唔得？」
「啲檢查有無得改唔係平日？」
「乜政府都有咁多檢查架咩？咁好架？」
「真係要個個月檢查架？」
孕媽基本上每個月都要「循例」到政府醫院、健康院進行產前檢查，有某啲檢查或者會需時比較長，所以都會為孕媽開出一整天嘅假紙，以方便孕媽們可以於檢查後可以安坐家中好好休息。
我當時因為怕向公司請假太多，所以都把私家嘅檢查盡量安排在星期六，以免造成更多額外問題。
而孕媽媽 尿頻、嗜睡、成日肚餓卻被誤會成偷懶借口，但其實尿頻、嗜睡、成日肚餓都係因為懷孕而引起嘅反應，可不是孕媽媽的錯喔。
你要知，就算孕媽媽唔食，小BB都會反抗，想當初小JM在肚內每天都定時提醒我要吃下午茶。
到孕後期睡眠質量更加比之前差，所以孕媽媽真係會好攰架，仲要面對隨時出現抽筋嘅反應呢。
生產以後：
在家坐月子時或多或少會收到同事或上司嘅訊息，內容先先會是恭喜，接下來就是無數嘅問題／難題，主要係想搵你幫手解決問題而已。
所以新手媽媽坐月子時，除咗要面對產後不適、學習湊小B、學習母乳餵哺之類以外，還需要抽空「解答」公事……你想像得到有幾攰嘛？媽媽可是要日夜不眠不休咁樣湊小B，幾乎每兩個小時就要餵哺一次。
所以生產以後，對媽媽來講能好好瞓一覺已經係天大嘅恩賜了。
當媽媽對湊小B變得「得心應手」之時，媽媽又要準備為復工做好準備了。而對於餵母乳嘅媽媽來講，復工真係絕非易事，因為要提前「預演」上班後泵奶嘅次數及時間。上班泵奶真係唔係易事，要帶嘅東西亦都多，就好似：泵奶機、奶樽、奶袋、清潔用具、冷藏袋連冰等……
你可想而知有好多重，你能想像得到母乳媽媽每天要拎咁多野係幾辛苦嘛？除此之外，母乳媽媽還有機會要忍受谷奶、塞奶、乳線炎之苦，真係非筆墨所能形容嘅痛苦。
而媽媽每天要做嘅就係下班後第一時間趕點家，為嘅就係想同小B多啲時間見面、親餵，當時我每日都堅持自己幫小B沖涼添，係就係辛苦，但係親子時間一定要有。
返工泵奶，又唔敢用得多時間，又唔敢泵太多次。唯有食個快飯再嗱嗱聲去泵，為嘅就係怕俾人話我地用太多時間。
返工泵奶，儲奶又係一個問題，曾經試過同事開冰櫃拎野，但一直唔關好櫃門，想等到自己整完野先閂。呢啲情況真係唔知點好，但當媽嘅就緊係決定出聲啦。除此之外，我亦曾遇過同事們嘅戲言，對話大概如下：
A：「噢，原來公司無晒奶。」
B：「咖啡都可以唔落架啫！」
A：「咖啡點可以無奶架！好傷身架！」
B：「雪櫃有呀！JM媽啲奶，你拎去用囉！」
其實可以係戲言，但係對母乳媽媽來講已經係一種侵犯，「說者無心，聽者有意」呀，明無？
我一直係公司都係用會議室來泵奶，但我只會係午飯時間用，因為唔想阻礙公司同事開會。
但其實到左小JM半歲左右，公司似乎已經「忘記」咗我係要用房泵奶，有時有意無意間都會係午飯時間用咗呢間唯一嘅房去開會、食飯、打機……而我就唯有等佢地用完先再用係啦。
到咗小JM一歲後，媽媽我已經決定停泵，因為壓力真係太大。幸好嘅係小JM加固理想，所以只係早晚奶都足夠。
而造成今次小JM媽媽要爆發嘅原因亦都係來自工作，最主要還是以下兩個主因：
－ 下班後被炸訊息，要求回應及回覆
－ 言語上被不禮貌對待
連續幾天不斷被炸，仲要被受不禮貌對待，對話中有幾難受真係自己先知：
「我講緊中文……係咪好難明？」
「有乜咁難明？ 」
「人呢？」
……
「E？依家決定外判比人做呀？唔係你整咩？」
「因為我覺得自己整好簡單唔洗外判比人做，所以我以為你會自己整。」
……
但事實係我已經做晒囉，唔該。
對於遇上呢啲咁無禮、又唔識尊重人嘅人 (啊，唔好意思，唔係同事，係老闆們sss)，其實我一向都會揀唔出聲回應，但佢地就偏要逼你點應不可，當下真係有個衝動想退出Group就算！
而家每朝嘅動力就係來自小JM，唔知點解，自從第一晚俾人激親之後，係第二朝小JM竟然陪我起身。係我刷完牙洗完面後，小JM張開雙手表示要我抱，唔抱抱就扭，當下我抱咗小JM一下，抱完我之後，小JM對住我笑，再拎開食緊嘅奶咀錫落我度，再用力咁抱住我。當下我喊咗，因為媽媽覺得好感動，人仔細細嘅小JM竟然識得關心人。媽媽當下真係覺得好開心好感動。
有時臨瞓小JM都會單手抱住我臉，再輕輕摸下，其實真係好sweet。
因為小JM嘅舉動，媽媽曾經有一刻動搖過想即刻轉做「全職媽媽」，但細想過後，其實時機還未到。或者等小JM正式上學前啦！
小JM，媽媽會同你一齊努力架！
我地都要加油！
