2017-07-31

26.1K

【小產後回顧】爸媽手記:失去過,所以更珍惜!!

最近朋友們或親友們都有問起我會唔會想多生一位小B陪小JM!

其實呢個問題我同老公早就已經商量過。

我地的確有打算多生一位小Baby,但一切也得「隨緣」。

我地亦不打算強求,

或許一切都係因為「失去過」而令人看得通透。

 

其實從小我已經會幻想著長大後既自己會有一個點樣樣既家,

家裡會有咩人,日子會點樣過,生活會係點樣。

慢慢長大後就不其然覺得「家庭」要有至少四位成員,

當中要有爸爸、媽媽同兩位小寶貝

認為咁樣就係「圓滿」,係最理想既家。

或許呢一切都係因為屋企而受到既影響,

總覺得小B們要有伴,一起玩、一起學習,才不至於太孤單。

 

對我而言要完成及分享呢篇文章的確不易,所需要面對既勇氣亦不少。

那年,我曾經失去了一個珍貴既「小天使」。

 

從前既我,可以話係一個工作狂,

每每一埋頭工作就會唔識停,

甚至會忘記要食午餐添。

到後期夜晚放工仲要去設計,

結果時間更見「唔夠駛」,

有時候工作及功課忙起上來也要做到半夜兩、三點才會停下休息。

 

而更甚既係,我本身既體魄稍遜,

每每遇上天氣變化,氣溫轉變總會遇上氣管敏感或上呼吸道問題。

 

時至現在,我依然好清楚記得那一段既日子。。。

 

當時既我因為氣溫轉變及太少時間休息所致,結果真係病倒。

已經睇左二、三次醫生依然無咩好轉,

到睇第四次醫生既時候,

醫生建議服用抗生素去幫助、減輕病情。

 

食左足足幾星期西藥,身、心都已經攰透,

當下突然記得原來「大姨媽」遲左幾日仲未來搵我,

而當時卻萬萬諗唔到既係,原來「小B」已經係不知不覺間而降臨左。

但那時候既我就以為係因為病及食太多西藥而引致「大姨媽」遲到。

 

再過幾日,係返工既時候,突然發現似乎「大姨媽」靜悄悄咁來左。

當時以為係「大姨媽」大駕光臨,誰知到晚上同第二日都無見過「大姨媽」蹤影,

於是乎心裡不禁開始有啲亂,有啲不知所措。

結果就叫老公去買棒棒留待朝早再驗。

 

第二朝一早起身我就直奔往廁所,

我足足係廁所逗留了差不多二十分鐘,

當時結果顯示我已懷孕啦,「小B」原來已經無聲無息咁降臨。

第一時間當然要話俾老公知,

老公亦即時請假陪我到就近既婦科醫生再驗一次。

醫生亦好肯定咁話俾我地知,「小B」的確降臨左!

我地知道之後真係好開心,而老公亦第一時間轉告家人。

 

醫生亦都提點我地要去政府醫院作登記,

同時有需要亦可以預約私家診所作產前檢查。

當知道要到政府醫院登記後,

老公都有陪我一齊去做登記,

但原來係政府做產檢係要等好耐架,當下真係被嚇怕左。

 

第一次政府檢查時,除左要做抽血,亦有做「超陰波檢查」(俗稱陰超)。

好記得當時檢查既時候醫生同姑娘都話未見到「小B」既「閃閃」(即係心跳),

但醫生及姑姑亦有安慰我,叫我唔駛太擔心,可能只係小天使未夠週數,

所以先未見到/未看得清「閃閃」。

隨即姑娘就表示會再幫我安排下星期再覆診檢查。

 

因為心裡有不安感覺,所以我地亦轉至一間位於銅鑼灣既婦產專科再做產檢,以防萬一。

到達診所既時候,我已經顯得十分緊張同戰兢,

好擔心「小B」會有事,畢業早幾個星期自己又病倒,食左幾星期藥,

諗到呢度自己又開始自責起來,

總覺得自己無好好照顧好身體,只係忙於工作及學習。

 

過左一陣,終於到我要入診症室見醫生了,

醫生並無叫老公陪同我入診症室,

當下得自己一個我只覺得更加驚恐。

 

醫生粗略地同我傾左幾句就叫我躺到產床作陰超檢查。

醫生表示仍未見到「閃閃」

我就同醫生講,早幾日出現過「見紅」現象,

醫生只係冷冷咁點應表示:

「其實唔駛太擔心,可能未夠週數者,又或者著床個陣見紅架者,無野既,無野好驚。」

其後我亦表示我擔心我之前病同食藥會有影婚,

而醫生當時既回應係:

「影響就唔知,我都唔知道你食左啲咩藥,我都幫唔到你。

但而家就未見到閃閃,都無得驚,返去休息下啦!有需要先再來睇過啦。」

 

當時醫生既冷淡感覺及回應不禁嚇怕左我,

一出診症室門口我已經想喊,

眼淚已經不停在眼眶內打轉。。。

 

隨後日子我亦不敢再埋頭工作,

亦跟學校那邊請了一、兩堂既假去休息。

 

誰知,好景不常,就係返個陣發現見紅情況,而且比前一次多。

結果我直接通知老公及老闆我需要早退,

而老公亦都「飛的」來接我往就近既急症室。

 

因為當其時「小B」還未滿十二週(醫生估計只有八週左右),

而我亦有帶備由政府醫院及私家醫生發出既懷孕證明及懷孕覆診卡,

所以等待時間唔算太耐,

(但亦要用上大半個小時去等候先被獲安排見醫生及姑娘)

同醫生及姑娘講解過整件事情後,

我被安排短暫留院,準備安排檢查。

當時我被安排留在急診室內,

還好老公可以陪伴一旁,

否則我應該會被嚇呆。

檢查後得出既答案都係話未見到閃閃,

但今次醫生有同我講解點解會造成「見紅、流啡」既現象,

令我了解到原來除左作小產以外,原來「小B」們努力著床個陣都會有機會造成流啡或見紅既。

同時醫生亦叮囑我千萬要卧床休息,直至下一次產檢。

因此醫生亦為我開出一個星期既病假紙,

而卧床既那一個星期對我而言的確十分漫長。。。

 

終於到左政府產檢既日子,今日心情有點緊張、忐忑。。。

係醫院呆等左差不多兩個鐘,

終於都到我要入診症室,今次亦需要進行陰超檢查。

對我而言,未檢查我已經感到有無盡既恐懼。

 

今次檢查醫生話依然未見到有「閃閃」,

因為估計正常已經會見到閃閃先岩,

醫生見到呢個情況就要求我抽血驗懷孕指數。

同時,醫生亦俾一定個小小既忠告及最壞打算俾我知,

解釋如果到時抽血驗到既懷孕指數比前一次跌超過一半既話,就表示有機會「流產」。

 

當時我只好固作鎮定,聽從醫生及姑娘指示去做抽血測試。

唔知係自己緊張還是幫我抽血既姑娘係新手,

試左兩、三先可以正式抽血,

但事實上手臂既痛遠遠不及心裡既痛。。。

 

抽完血後,姑娘指示我去辦理手續以預約及安排下一次產檢。

完成手續後就慢慢同老公一齊回家休息,

但今日更覺得回家既路特別漫長。。。

回到家中以後,老公就幫我煮少少野食,

等我食完可以休息一下。

雖然話係休息,但躺在床上既我卻不停反覆思量,

思緒顯得好混亂,心情亦很不安。

因為老公下晝仲要返工既關係,家中就只剩我一人。

卧床既日子以來,除左去廁所及食早、午、晚餐以外,

我都有乖乖聽從醫生既指示好好卧床,

所以我真係好希望「小B」會無事。

而每次上廁所既時候我亦顯得十分之戰戰兢戰,

因為總係怕會見到流啡、見紅得現象。

 

到傍晚大約六點零左右,

突然我收到一通無來電號碼既電話,

心中不禁有啲緊張,

原來真係醫院打電話來,想同我講一件好沉重既事。

姑娘話:

「今日抽血驗出來既懷孕指數跌左超過一半,

有機會「小B」已經無左。

呢幾日有機會去廁所既時候會見到有血塊,

或同平時「大姨媽」差不多既流量就表示「小B」已經正常排出身外。

係呢個情況之下就唔需要再返來做檢查啦。」

 

話音未落,我整個人已經跌坐在床邊,哭成淚人。

唔知過左幾耐,我先回過神,先想起要通知老公,

但眼見時間都已經唔早,老公已經係比賽既場地了,

所以一直爭札好唔好打俾老公,

到後來,我都係打左,口震震、眼濕濕咁同老公交代左「小B」既事,

老公想要返來陪我,但我就決意叫老公專心比賽,

當然我知道係唔可能專心到,

但我當下只係想一個人好好咁冷靜一下。

 

過左兩日,老公陪我去另一家既婦產科做檢查,

睇下「小B」到底係咪已經被排出。

陳醫生知道我不安、傷心,所以亦試著安慰我。

(唔係銅鑼灣個惡醫生 LOL)

陳醫生話:

「其實你地仲後生,唔好太擔心。

之前聽你太太講過因為陀BB前病左一排,

雖然未必關事,但係都要好好調理一下身體。

胚胎著唔到床其實仲有好多原因,

唔一定係母體本身問題,

可能係胚胎自己唔夠強壯,所以黏唔住子宮壁。

亦有少部份第一次懷孕既媽媽們會好易出現流產,

而成因亦都係一個謎來架。

所以,你都係好好休息,唔好諗太多。

希望下次再見你既時候又會有好消息啦!」

 

「小B」最終都係走左,成為左我們既「小天使」守護住我倆。

呢一段日子雖然難過,但我地亦感恩「小B」曾經來過。

而最奇妙既事係之後一年係同一個時期我地有左小JM。

或者,小JM就係「小天使」派來我地身邊既一位寶貝。

「著床」係咩?

著床,其實係指卵子受精之後會進入子宮,繼而係子宮內膜遠離子宮頸位置定落來著床。

如果受精卵成功可以著到床既話就會慢慢係子宮內膜吸收營養,慢慢形成胎盤,再形成為小B架!

而有少部份孕媽會係著床初期個陣會有少量見紅/流啡,

個陣陳醫生用左個好有趣既方式來同我打左比喻,

陳醫生話受精卵要著床就要係子宮內膜「鑽窿」,所以會有機會出血,

當然每位媽媽體質都唔一樣,所以都唔一定會有見紅/流啡現象。

 

但若然著床失敗既話,就會造成流產,而受精卵就會同子宮內膜一齊剝落。

(我就係著床失敗既例子。。。)

而一旦受精卵著床落錯左去其他位置,就有機會造成宮外孕或胎盤前置之類既問題架啦。

 

流產有咩徵狀?

根據醫生所講,原來流產最大機會發生係懷孕初期約六至十二週或者更早。

孕媽媽可能會有出血及腹痛既現象。

而孕媽媽們亦有機會係毫無徵兆下而流產架,我就係呢一類啦。

如果腹痛同出血嚴重,就有可能係胚胎被排出體外既徵狀。

【編按:以上內容為作者之個人意見及立場】

相關文章

【幾個移民媽】海量移民資訊湧入腦 移民媽:「怕做錯決定!」

【炫富無極限】泰國母子狂曬奢華生活 展現非一般母子情

【運作記憶與學習】6招提升孩子專注力及短暫記憶能力

【拍住童你試】小朋友偏食大作戰 改變烹調方法即刻肯試兼愛上?

緊貼新冠肺炎最新相關資訊