【母乳媽媽】飲出豐盛母乳路

打從知道懷有臭豬B起，我已同老公溝通，表示我會以母乳餵養臭豬B，而當下老公亦表示會全力支持，因為老公都明白母乳比奶粉更符合小朋友需要，而且營養較為豐富，更可以加強小朋友免疫能力。老公仲身體力行，陪我買母乳用品添。

但當懷著臭豬B到五、六個月嘅時候，我曾經試過被長輩勸阻餵母乳，當中嘅對話令我感覺有如被潑水一樣，對話如下：

A：長輩 C： 我

A： 你第時想餵人奶呀？

C： 係呀，因為知道人奶對BB嘅免疫力好啲，會健康啲，而且營養都好啲。

A： 嗯，但係都餵唔到好耐。你打算餵到幾時？

C： 如果可以至少餵到一歲啦，會比較好呀嘛！

A： 嗯，頂多咪到三個月。

C：（搶答）我想試下餵到一歲！

A：畀盡你呀咪餵到半年，咩都夠啦，你邊有咁多奶呀？

C： ……（無言，只能以笑相對）

而另一次被打擊係發生係BB出世後因黃疸而照燈，長輩A不停叫我買奶粉，話臭豬B食唔夠所以黃……

到臭豬B滿月，我再聽到另一位輩份更高嘅長輩同我講以下對話：

B：點呀？餵人奶辛苦嘛？

C：唔辛苦，最緊要BB好啫。

B：諗住餵到幾時呀？

C：如果可以想餵到一歲啦！

B：嘩！一歲！餵到三個月好啦，唔係會好痴身架！記得啦，餵三個月夠啦！

C：……（無言以對，而且我開始有少少黑面）

先澄清一下，我媽媽都非常支持我餵母乳，因為我同細佬都係飲母乳餵大嘅，所以媽咪都覺得我嘅決定同選擇係啱嘅！至於對話中既A同B係邊個，我亦唔想多提。

我想話：我而家係一個「富媽媽」，我復工後一日只泵四次每日「產量」仍然有四十幾安。我為咗唔被人睇低，係臭豬B出世之後都一直密密埋身餵，直至復工前個幾星期先轉做「泵媽」。為咗保持及提升奶量，我一直都盡量休息同應食得食（遇強越強系統已經被啓動）。

除咗平時多飲水或湯水以外，我發現有三樣飲品對我來講係可以做到提升奶量嘅效果！

1. if 椰青水

早係孕後期已經開始飲，既可清胎毒又清潤，原來產後飲更加可以增強奶量， 所以真係一種唔錯嘅飲品！

2. 牛油果鮮奶加蜜糖

呢一款飲品需要自家製，而材料好簡單：牛油果半個或一個、鮮牛奶一盒至兩盒、蜜糖適量。

做法：

1. 先將牛油果切開去皮。

2. 將牛油果放入攪拌機攪勻。

3. 將鮮牛奶加入，同牛油果一同攪拌。

4. 最後再加入適量蜜糖就可即時飲用。

** 如果唔想飲凍飲，可以係打勻晒之後拎去加熱，係飲之前先加蜜糖都得架**

因為牛油果唔係個個都接受到佢嘅味道（包括我），所以我會落多啲牛奶同蜜糖去沖淡佢原有嗰種青草味。如果接受到牛油果的話，其實就咁食已經有增奶功效，但可惜我真係接受唔到，所以就只好將佢打成汁一齊飲。

3. 黑麥汁

黑麥汁其實係一種天然素食品飲料，味道香甜，有氣，好似汽水咁。黑麥汁含有豐富蛋白質、維他命、礦物質及天然酵素，能夠減低動脈血壓，增進血糖代謝，而對於餵母乳的媽媽來講，黑麥汁更可產生發奶嘅效用，更可以令皮膚變好，而黑麥汁中既纖維更加以幫助去BUBU添。

我雖然唔係日日都飲以上嘅野，但有飲嘅日子脹奶情況真係會快好多。復工前個零星期開始調節泵奶時間，啱啱復工三星期，而家每日都會泵四次，時間分別係： 0700；1300；1930；0000（每次三十分鐘）。好感恩復工後依然保持到奶量，平均每日都有至少四十安，多嗰陣可以有四十六或四十七添！

臭豬B嘅糧食（呢度兩枝夾埋十二安）。

一日奶量夠晒臭豬B食有餘，食唔晒個D仲可以冰起佢，以備不時之需。而家嘅儲備因為已經多到塞滿咗成個冰櫃，所以只好將4月份嘅拎來沖涼，再將新嘅儲起。

呢度就係上格雪櫃嘅情況啦，左手邊嘅冰奶會朝早拎出來溶雪，等夜晚同臭豬B沖涼用；右邊個啲就係每日新鮮嘅媽媽奶，會係每次泵完分好晒合適嘅安數，方便返工嗰陣姐姐或屋企人餵（我只會keep住五枝存貨，有多就冰起以免浪費）。

呢度就係成個 5月份嘅儲備，已經滿晒全個冰格啦，可以話係儲備充足。

正因為呢個成果，長輩A已經無再出聲提起「買奶粉」呢回事。

所以各位雙職媽媽都要加油，我地唔可以被人睇低架！我地自己都未嗌辛苦，長輩們又憑咩阻止我地！