2021-01-02

3.8K

【美國天才班實錄】千里馬還需伯樂 識別「天才兒童」五大特徵

早前講到,我哋驚嘆「天才班」嘅前衛理念,最終接受咗邀請。話說回來,學校到底點樣,識別有潛質嘅學生呢?校長當然訓練有數,深知其中奧妙。我一向打爛沙盆問到篤,佢欣賞我咁好學,就舉咗啲例子。哇,好險啊!好彩我慢半拍,面對囡囡唔符合成人世界嘅言行,我選擇咗停一停、唸一唸。否則我真係辣手摧花,悔不當初。

更多文章:恐子女「升中呈分試」壓力爆煲立即飛英國留學?

原來聰明(Bright)同有天分(Gifted)係有好多唔同,大家細心觀察自己嘅細路,就可以對號入座。篇幅有限,暫且列舉5個特徵:

聰明(Bright有天分(Gifted
知道答案提出問題
完成任務發起項目
精確複製自創設計
記憶力好推理力強
喜歡與同齡人相處偏愛與成年人交流

聰明(Bright)嘅特徵

例如,面對考題,聰明(Bright)嘅細路,可以講出完美答案,佢按時完成功課,分毫不差拼好3000粒嘅LEGO太空戰機,佢記性好,又鍾意同朋友仔玩。佢係學校裡面嘅好學生,鄰居口中嘅隔離陳太個仔。佢係老師讚賞,父母放心嘅完美角色。佢成年之後,躋身「四師」之列,作爲專業人士充當社會棟樑。

有天分(Gifted嘅特徵

相比之下,有天分(Gifted)嘅細路,可能係你屋企嗰個「史仔包」「史女包」。面對同一個問題,佢唔單止冇完美答案,仲問三問四煩住晒,你忍不住鬧:收聲啦唔該。佢有功課唔做,而去玩甜醬、辣醬、花生醬呢啲混醬嘢,激到你把幾火。佢將你嗰幾盒限量版LEGO,溝亂晒,整咗個不倫不類嘅怪物。你都未教佢middle嘅串法,佢就識少少扮代表,寫成mido,於是你鬧佢:乜都靠估,叻唔切,罰抄10次。佢特別鍾意同大人傾計,你就趕走佢:大人講野你識咩,同啲細路玩泥沙啦。

更多文章:十年準備女兒留學 港媽Vikey:勿忘關注仔女心態

 

更多文章:美國「天才班」老師大讚串錯字:最怕學生不敢犯錯

社會需要多元化

試問,推動人類社會嘅創新,有邊次出自一個循規蹈矩嘅人?破舊立新,要有破嘅勇氣。開天闢地,要天生嘅冒險家。呢個社會,要知識豐富嘅人,更要懂得發問嘅人;要認真完成任務嘅人,更要自立命題嘅人;要複製精確技巧純熟嘅匠人,更要唔怕撞板大膽創造嘅狂人;要過目不忘嘅good memorizer,更要膽粗粗嘅good guesser;要八面玲瓏嘅社交高手,更要享受獨處同沉迷黑洞嘅思維好手。

面對一個有天分(Gifted)嘅細路,而你錯用聰明(Bright)嘅標準去要求,佢一定充滿委屈、掙扎、與不解。自出娘胎,佢懷著對呢個陌生世界嘅恐懼與好奇,努力生活。佢嘅天馬星空,成爲你口中嘅亂噏廿四,令你一次次失望。於是佢賣力改變,務求符合你嘅成人目光。最後佢博得你一笑,但係已經冇咗自己。呢個係你想要嘅童話結局live happily ever after嗎?

【編按:以上內容為作者之個人意見及立場】

相關文章

【幾個移民媽】英國學校特別活動日 Break The Rules Day奉旨犯校規?

【幾個移民媽】初到澳洲搵學校好頭痛?專家:先了解子女興趣

【幾個移民媽】港英家長討論區術語解碼 甚麼是AIBU?

【幾個移民媽】澳洲睇樓買樓大不同 移民專家:三個重點要留意

緊貼新冠肺炎最新相關資訊