2018-10-21

2.7K

未了解真相前,先相信小朋友!一句質疑足以傷害他們

#圖文不符天真純潔慨笑容系媽咪最愛

雷大囡成日問我,做咩佢做乜諗乜我都估到。

每次我都答佢:「我地有條隱形嘅臍帶連繫住,所以佢諗乜做乜我都知。由懷孕果刻開始,我地一直有條臍帶連繫着,雖然出世後會剪斷左,但我地只係從有線變左無線接收姐」

細細個果時佢會覺得好神奇,到而家大左開始半信半疑,但呢個係我地嘅小默契。只有相信,佢先解釋到點解佢諗乜我都知。

實際上呢條無線臍帶存唔存在冇人知。但個個媽媽都好了解自己子女,媽媽從bb一出世就開始要估佢想點,估佢想食奶定想poopoo、點解會喊、點樣止喊...從出世果一刻開始睇佢尾頭眼額。個個都係福爾摩斯嚟㗎嘛,點會唔知你想點吖!

所以我個囡係咩人咩性格我絕對了解。我知我個囡係比較內向,比較唔識表達自己。

小學四年級算大定算細冇標準,只可以對事而論。有人話咁大個唔識表達自己係唔得。雖然我都會鼓勵佢學習嘗試表達。但我唔會迫、亦知道冇得迫,唔需要迫。人冇完美嘅,我而家咁多野講咁嘈,其實我細個性格仲內向過雷大囡。

人會大,性格會轉變。我會俾時間佢慢慢摸索。只要佢心係善良,外向內向,好靜好動又如何?唔通每個人都要教到一式一樣用個模印出嚟會比較好咩?

但當然我地大人知道,唔敢表達自己好蝕底。但你估個小朋友自己唔想表達嗎?佢只係唔識,唔敢。同大人唔同,大人表達自己冇負擔,可以為自己嘅說話負責。唔洗驚呢樣驚果樣。

但小朋友唔同,佢地比我地擔心嘅更多,唔敢大聲講野,怕老師話俾媽媽聽,唔知媽媽會唔會鬧。怕媽媽話俾老師聽,唔知老師會唔會罰。太多野怕,所以好多時俾人問多2句就唔知點答。唔係因為佢想講大話,可能只係怕答錯。

作為成年人,可唔可以俾啲空間小朋友呢? 唔好因爲佢說話吞吞吐吐就懷疑佢做壞事或者想講大話!大人被質疑自己嘅誠信都會好難過,何況小朋友嘅弱小心靈?

一句懷疑嘅說話可以傷得小朋友好深...特別係一啲平時已經唔識表達自己嘅小朋友。你一句質疑已經可以打破一直以來對你嘅信任。

所以,請大家未了解事情真相之前,請先選揀相信小朋友,幫助佢地解決問題。而唔好用質疑說話懷疑嘅態度去「了解」真相。咁只會嚇壞小朋友。更傷害佢弱小嘅心靈。

Facebook:雷囡媽媽

【編按:以上內容為作者之個人意見及立場】

相關文章

【幼兒情緒】小朋友放學後總是鬧情緒?心理學家建議4個方法幫孩子改善!

【開學準備】小朋友上學有分離焦慮?爸媽必看5大改善方法 !

【1-5歲教養】教導孩子「分享」,爸媽要知道的「分齡」法則!

【教育方程式】暴躁小孩當媽媽仇人咁 聲大夾惡如何管教?

緊貼新冠肺炎最新相關資訊