因航都唔係咁差啫

雖然今個聖誕冇出埠玩，但青冰已經plan緊下年的復活節外遊，暫定都係長線旅遊，咁預早上網check定機票及酒店，係指定動作啦，近期國際油價跌至18個月低位，短短兩個月由高位跌近五成，速度之快可媲美14年的油災，按常理推斷，機票的燃油附加費應該會減吧，點知上到國泰(0293)的網站一看，長途機的附加費只由652蚊微降至584蚊，一月生效，減咗68蚊，一家三口就慳204蚊，真係多謝晒呀，但換個角度講，仍然要畀1752蚊，仍有點肉赤。

由於早幾年油價低殘，民航處在2016年禁止了航空公司收附加費，順手委託顧問公司作研究報告，結果係有見國際間已逐步撤銷對燃油附加費的規管，所以不如撤銷禁令啦，但必須在總票價時清楚列明機票價格、燃油附加費及稅項的分佈，國泰在9月就帶頭復收，刺激當日股價急升7%。

現時資訊發達，有咁多網站幫你比較機票價格，好難再在油費上作取巧，不過現時好多優惠及廣告，仍著重以機票價作噱頭，但往往加埋surcharges，咪同競爭對手差不多。

提起燃油，大家應該仲會記得國泰的神級對沖，令業績連續兩年見紅，11至14年油價長期高企100美元樓上，唔知邊位高手決定為未來四年的燃油作大手對沖，將燃油價鎖定在約90美元，對沖比率高達六成，跟住大戶似乎睇住佢來打，布蘭特期油從14年6月高位115美元，7個月內跌至45美元，記住人地係用布蘭特油價作指標及對沖，不要睇住紐約期油去為布蘭特計數啊，否則就貽笑大方喇。油價急插，一般航空公司梗係拍爛手掌，但「因航」對沖比率咁高，註定過去幾年係要挨貴油，年年因對沖而蝕幾十億。衰咗幾年，搞到樣樣要縮減開支，服務質素自然下降，早前的乘客個人資料外洩事件，難免被人懷疑係同cut cost有關。

上月底的分析員會議，國泰披露下年的對沖比率約三成，鎖定成本在60至70美元，對沖比率較年初所講的略高，或許因為今年8月起挾得太急，衝上85美元，臨急臨忙補返啲，因為那時個個都話油價睇一百嘛。最新的布蘭特油價是50美元，雖比成本價低兩成幾，但總算大有進步啦，況且仲有七成冇對沖，應受惠油價怒插，唔好忘記佢仲有收燃油附加費的，這亦是作為乘客的青冰想投訴之事。