兩公婆相處有時候最怕就係「老奉」！老奉隔離嗰個一定要為你付出，老奉隔離嗰個隨傳隨到，而自己根本無諗過對方需要啲咩，只顧自己吃喝玩樂；到需要幫手嘅時候，就認為揚揚手，對方就要仆到埋嚟，其實就連父母嘅愛咁無私都未必做到啦，而且你又有無諗清楚，你係揀另一半定奴隸？
最近就有JM問到大家係咪都係被老公忽略嘅一群，講嘅忽略並唔係單單唔講嘢、感情變得平淡嗰隻，而係精神上嘅忽略，當正老婆係秘書一樣，只談「事務」不談「感情」，仲要加埋「事不關己」，只有佢同佢屋企人嘅事先係「事」，女家有咩發生就一於好少理，換著係你又會點處理？
「你各自各都好！我衰佬要我顧佢屋企人！但佢從來不理我屋企！好似唔關佢事咁！」
「我都想佢忽略下我！唔好奶奶上網續約又搵我，報稅又搵我，自己啲嘢搵唔到又搵我！」
「我咩都處理好，但老公咩都問一餐先安樂，我都唔知佢有無忽略我！」
討論區熱話：你係咪比C6忽略嗰個？
討論區熱話：你係咪比C6忽略嗰個？
Juicy媽一聽到呢啲娶個老婆，當正人係工人+秘書+老母嘅C6就火都嚟，雖然話一隻手掌拍唔響，塵世間嘅故事，都係一個願打，一個願捱啫，之但係捱嗰個都有感覺，會攰、會傷心、會失望、會痛咖，有啲傻豬豬一直捱，其實都係等頑石點頭，以為終有一日會守得雲開，點知換來就只有變本加厲兼老奉，老奉照顧埋男家屋企上下左右大小事都算，有時自己屋企有事，佢竟然可以事不關己咁款，再離譜嘅害你分心照顧娘家，忽略咗「自己頭家」都大有人在！
其實做夫妻嘅嘢，最重要都係識調返轉諗，企喺對方角度諗，都莫講女人鍾意人氹，男人自己都鍾意聽好說話啦，娶個老婆返嚟，首先就唔係奴隸，更加唔係工具、擺設品，鍾意、需要嘅時候先拿上手耍兩下，轉頭有新玩具就放埋一邊，咁樣幾襟捱都捱壞啦！
