2020-05-12

2.8K

【JM有話兒】愛情底線有幾低?網民 : 不論男女,哪個能真接受呢?!

愛情呢樣嘢,從來都係又霸道又唔講理,每個人心目中都有把尺,而且量度每個對象都有一把唔同嘅尺,無得估嘅同時,更加會隨住每個人成長轉變、財政狀況、價值觀而轉變,即係面對轉變,你根本無權講:「以前你都唔係咁!」,因為大家都再唔係以前嘅嗰個人,有人行得快啲,有人行得慢啲,上秒你行得快啲,下秒我行得快啲,夫妻之道大概就係「同步成長」,「等埋你」都係一種愛。

夫妻之間,時間成為彼此最大嘅敵人,若然喺前進嘅過程中,稍稍出現步伐不一,就好容易出現感情裂縫,輕則「床頭打架,床尾和。」,重則情感列車隨時出軌,到時就真係傷亡慘重!

最近就有JM向大家提問:「你會接受到老公曾經出面有女人嗎?」,如果Juicy媽仲係18、22應該第一時間就斬釘截鐵Say No!成日都話「一次不忠,百次不用。」,自己仲有大把青春,做咩要咁委屈!之但係人大咗,望住身邊嘅離離合合、生離死別,要割捨又係咪仲係咁瀟灑?

「你睇夫妻的世界,幾個女人都有唔同選擇,自己條底線係點得自己知!」

「我自問拔唔走條刺,話原諒都係自欺欺人,寧願俾機會,放生自己~」

「作為女人,不原諒但也不離婚。但會出去玩,咁先公平;男女平等原則。」

「每個人底線唔同,包容度亦唔同,有人愛到接受不忠,有人愛到容不下一粒沙,旁人唔好比太多意見。」

討論區熱話:你會接受到老公曾經出面有女人嗎?

討論區熱話:你會接受到老公曾經出面有女人嗎?

其實婚姻到底係咩?每個人答案都唔同,面對不忠、第三者呢啲問題,Juicy媽認為最緊要都係問自己,經濟能力、子女問題、惰性慣性,通通都係影響你下一步嘅因素,有人死性不改,有人浪子回頭,旁人又唔係你,你同另一半經歷過嘅嘢,人哋又點會明,第三者從來都係愛情入面嘅警號,如果兩口子相處得如膠似漆,有問題會一齊解決,同步成長,了解彼此需要,又何來裂縫可以比第三者插隻腳埋嚟呢?

講到呢度,唔係話另一半出軌都係正印嘅錯,而係或者三角都有責任,如果你話正印已經為頭家付出好多,好似工人一樣,做牛做馬,從正印角度就梗係「我仲有咩錯?」,但呢啲付出又係咪對方需要呢?Juicy媽成日都話,對方鍾意食蘋果,一個蘋果就夠佢甜足一世,你係要日日派蕉比佢,咁你又唔係對佢唔好嘅,只係無了解對方真正需要啲咩,若然大家感情基礎夠深,或者第三者正正係一個衝擊,提醒大家往後嘅路應該點樣重拾彼此嘅步伐,所以「邊個可以真正接受另一半曾經出軌」呢個問題,或者應該要睇成「邊個有勇氣同決心將呢段愛情重新洗牌一次」,重新再去認識呢位眼前人,重新再去經營一段「舊人新情」!

【編按:以上內容為作者之個人意見及立場】

相關文章

緊貼新冠肺炎最新相關資訊