嫁著個「超級媽寶」係咪只可以離婚收場？

嗰日喺forum見到個post講老爺奶奶跟埋個老公入產房睇新抱生仔，即刻撳入去睇，原來發生喺台灣！真係嚇死人，仲要係個老公呃啲醫護人員，老婆應承咗畀佢哋入嚟，離晒大譜。老婆生緊仔都夠辛苦，仲要畀在場「觀眾」分心，一陣佢哋阻到醫療人員行動就大劑喇！

之前都有見網民呻過生完之後奶奶唔關心自己，其實保持距離先好呀！奶奶仆心仆命咁對自己唔一定係好事嚟。好似呢單case咁，因為呢胎係男丁，奶奶緊張過頭，日日走去摸新抱個肚，爭住唱歌仔畀粒孫聽，真係諗起都驚。

講返「參觀」生仔過程，而家睇緊Discovery Channel咩？成家都唔識尊重個新抱，當人生仔機器咁款。有網民話畀人望住生仔話同眾目睽睽之下被強暴一樣咁令人難堪，Juicy媽覺得一啲都冇錯。聽聞事主坐完月之後就要即刻搞離婚，大部份網民都支持，仲話出院就好離喇，早走早著。唔係遲早佢哋要仔唔要乸，又縱到個孫二世祖都似。

不過講就容易，始終為個老公生咗個小朋友，事主冷靜落嚟之後係咪毅然走上單親之路都難講。可悲嘅係生小朋友一件咁開心美滿嘅事，畀嗰對老爺奶奶多多事幹搞到咁唔愉快。搞到個仔家庭決裂，損人不利己。

經一事睇清另一半幾咁「媽寶」，都未嘗唔係一件好事。有網民話唯一出路就係企硬禁止老爺奶奶再出現係自己生活，個孫都係一年見一次好喇，反面就只有離婚呢個選擇。女人結婚生仔，唔代表冇晒人權，畀老爺奶奶想點就點。呢啲時候，老公冇保護好自己，真係心都淡。

入嚟討論區一齊傾