BB幾個月大 老公話一定要帶佢拜山！

聽日係重陽，有網民老公話今年一定要去拜山，上年大肚先可以唔使去一次咋！但係BB先得嗰幾個月，仲要啱啱打完針。帶住佢走咁遠，唔好話大人辛苦，BB病咗就仲慘啦。

拜山掃墓固然係對先人一份心意，但如果要點名到齊，連出世冇耐嘅BB都唔缺席得咁未免太嚴苛啦。得罪講句，先人介唔介意冇人知喇，但而家介意嗰個係老公嘛，好可能都因為男家都有畀啲壓力佢。類似「你老婆上年唔嚟，今年又唔嚟呀？」甚至「生仔大晒呀」云云。媽媽當然以BB健康同安全為最大依歸，天氣唔好、郊外多蚊蟲、換片餵奶唔方便，呢啲因素都足以令媽媽卻步。

我覺得好無謂，唔通因為唔想得罪男家搵個BB去搏咩，有咩好搏吖，最佳參與獎呀？我係咁諗嘅，而家又唔係古時啲大家族，啲新抱除咗湊仔同服待長老就冇其他嘢搞。男家有先人，女家都有先人啊，做新抱嘅唔一定需要去拜男家嘅山。去嘅，係愛屋及烏，係承認成為呢個家族嘅一份子。呢件當然係好事，但唔去變千古罪人呢個講法，成件事就變晒質啦。

再講，有心拜山唔使等一年一次，將呢啲事變例行公事又有咩意思喎。

即刻入討論區一齊傾