唔知大家仲記唔記得自己拍拖嘅時候係幾時見家長呢？最近就睇到forum有位JM提問認為未準備結婚，點解要見家長？引起大家激烈討論，有人就認為「禮貌上問候下長輩都不為過嘅」、「如果我仔女同拖友拍咗一段時間，我會想見下呀」，又或者有人講到即使要結婚都係兩個人嘅事，而引發過來人有感而發：「唔好天真地想結婚係兩個人既事，結婚幾時都係兩個家族既事 」。
以我個人覺得，首先大家係點樣理解見家長呢件事呢？係見雙方家長，還是見對方屋企人先？前者感覺確實係比較凝重，一般嚟講都係等到認定對方，談婚論嫁先會噤做；至於後者，就真係好睇個人屋企Style。
有啲父母態度的確比較開放，覺得有邊個後生唔係成日換畫，帶返嚟知道個仔女同咩人拍拖都好呀，至少得個知字；而有啲父母又真係唔想個個都認識下，講明唔係諗住結婚，唔好帶返嚟.....潛移默化有咩父母就有咩仔女，自己父母一直灌輸自己唔係結婚唔好帶返屋企，自然就連對方屋企人都唔想見啦！不得不提，仲有啲個案係想另一半帶自己去見家長，覺得係種地位嘅肯定......
不過喺呢個個案上面，更有討論性嘅似乎係女方拍拖5年，但從來唔想結婚、生仔，反而係男方有意成家，女方更企硬表明，如果要婚，就寧願分！最後佢哋能唔能夠達成共識，相信就真係只有佢哋自己知喇！
至於我就睇到另一個現象，邊個話淨係女仔先恨嫁？
