2020-09-14

8.3K

【婆媳關係】生完BB收奶奶大利是?網民:你估個個都係家燕媽媽

生完仔一定會收到大利是?大唔大就見人見智啦,Juicy媽我生咗兩件,就唔會分享自己收到啲咩喇,但係最近就有新手媽媽喺討論區上面問一眾網民,到底有冇收到奶奶嘅禮物或者大利是?好多人都話羽毛都無條喎,但都有人話分別收到阿媽同奶奶6位數字嘅利是,當係辛苦自己生咗小朋友,要好好保養吓咁話喇喎。你哋呢?

熱門討論:湊孫係責任?

呢位阿媽就喺討論區咁問:「生完後,一般奶奶會唔會送禮物或封利是畀新袍?」佢就話係陪月問,「你奶奶封咗幾大封利是畀你?」佢就話自己無收到,陪月就話都唔係一定會有嘅,不過多數都會,所以就上網問吓其他人喇。但又咁講,仔生完係自己嘅,點解要收人哋利是先?Come on!依家咩年代呀?好在唔係得Juicy媽我一個咁諗,仲有好多網民都咁諗呀!

「生3個都無喎!我老公同自己媽咪都無畀我喎!」

「無,又唔係幫佢生,點解奶奶要畀利是?」

「香港無聽過有呢個習俗喎,就算我以前住圍村都無聽過佢地生仔會有利是收。」

「吓!煲煲薑醋畀新袍已很好了!禮物通常送畀粒孫!」

熱門討論:生完後,一般奶奶會唔會送禮物或封利是畀新袍

都有人話個陪月太八卦,「你個陪月係典型八婆!」問長問短咁。教佢答返個陪月:「你答佢,你估個個奶奶好似家燕媽媽咁好咩?」啱呀,諗返起家燕媽媽娶新袍嗰陣,就知家燕媽媽好錫新袍啦。當然啦,都有JM話收到「我奶奶有畀6位數利是我,我父母都有畀6位數利是我。」咁人人家庭都唔同嘅,你話係咪先?

「我小朋友滿月。奶奶送番我老公BB時戴過嘅玉鈪。套落我小朋友手。好過收大利是。我將來也希望我長命。可以套落我孫隻手到。」

呢個奶奶咪幾好!咁樣仲有意義啦!睇到Juicy媽我起雞皮呀,真心希望大家都身體健康,平平安安!無比較就無傷害呀,有心就得啦~

【編按:以上內容為作者之個人意見及立場】

相關文章

疫情下奶奶召開多人飯局 網民:一定唔可以妥協!

【有苦自己知】6299嘅傷人說話,變成心入面一條刺⋯⋯唔想引戰唯有忍囉!

我們都迷失在這場孩子爭奪戰中...

一人一句收過長輩咩禮物 利是、零食仲有OO

緊貼新冠肺炎最新相關資訊