2020-04-21

4.1K

【有苦自己知】6299嘅傷人說話,變成心入面一條刺⋯⋯唔想引戰唯有忍囉!

雖然網絡世界見好多婆媳大戰,但老實講句,現實世界中多數女人都想維持到(至少表面上嘅)和平關係。有邊個想家嘈屋閉,做埋家族古罪人先得架?忍到咪忍下,自己睇開啲囉。之不過,有啲傷人說話,真係會變成心入面一條刺⋯⋯

嗱,呢啲唔係記唔記仇嘅問題,因為言語傷害唔係你想化解就化解到!尤其係離間自己同老公感情,批評(更甚者詛咒)娘家嘅說話,真係會嬲到一世都難以釋懷呀!

例如同個仔講:「唔好對你老婆咁好,因住縱壞佢!」Well,我老公對我好都有意見,有冇咁黑心先?!唔想見到個仔家和萬事興,係咩心態?

又或者同個新抱講:「唔好成日諗外家點點點,嫁咗入嚟就係我哋嘅人,你生仔都唔會跟外家姓架啦!」喂,而家跟男家姓好威咩?你個孫唔使呀媽生呀媽湊嘅?咁巴閉叫你個仔單性繁殖囉!

我自己都有生仔,不過我以後一定唔會將呢種痛苦加諸喺新抱身上!冇錯輩分升咗一級係好爽,講啲說話唔經大腦係好爽,但貪一時爽有意思咩?自己都係過來人,積返啲口德好過啦。尊重係雙向嘅,我首先會尊重咗自己先囉。

喺呢度想同飽受言語傷害之苦嘅媽媽講:唔係你嘅錯,唔好一個人面對!雖然唔想挑起爭執,引爆一場世界大戰,但絕唔能夠輕視自己情緒!嘗試同老公溝通,或者同朋友傾訴吓。如果溝通過都冇作用,唯有同長老保持距離,專注喺自己生活上。有需要的話,就要去尋求情緒支援!做女人都係要愛惜自己,千祈唔好委屈自己呀~

【編按:以上內容為作者之個人意見及立場】

相關文章

幾時生B都要被99操控?網民:呢個年代仲要追仔 真係唔通氣!

斷絕母子關係咁嚴重?「林美戀」預告式婆媳糾紛戲碼

相處都講藝術!如果有得揀,真係有人自願同四大長老住!?

【JM有話兒】長老寵壞小朋友,父母有Say嗎?

緊貼新冠肺炎最新相關資訊