好奶奶唔易遇到！自從嫁入人哋屋企做「半邊女」，就注定要同「半邊媽媽」（奶奶）相處。新抱、奶奶唔係由細磨合到大，價值觀、生活習慣等唔同好易意見相阻，擦槍走火！不過，都有唔少識做嘅好奶奶，可以同新抱和洽相處。你有冇咁好命水遇到好好奶？即刻Click入討論區睇睇好奶奶有幾好：http://bit.ly/2pJ3WMh
5大好奶奶特質
1. 坐月時照顧起居
生完BB得攰到返半條人命，想食好啲休養但又要照顧初生BB，老公侍產假只得幾日，陪月員又唔一定安排到，如果奶奶可以幫到煮少少飯餸、做下家居清潔，已經幫到好多！
2. 主動幫手照顧兒孫
小朋友出世後媽媽日常時務即時大增，初生時要餵奶、換片、掃風；入學後要睇功課、執書包、親子活動，仲有一大堆家頭細務要處理，真係忙到有氣無地抖。如果奶奶主動提出幫手照顧BB，或者帶小朋友落公園玩一陣，等媽媽有得抖下，真係好感激架！
3. 尊重兒媳取向，個人意見吞落肚
奶奶同新抱年齡層唔同、受嘅教育、經驗都唔同，價值觀上當然會有出入（尤其喺湊小朋友方式上）。好奶奶最好係識得尊重兒媳嘅取向，接受現今世代的處理方法，喺唔會有明顯意外風險嘅事件上「不要問，只管做」，可以減少好多磨擦。
4. 唔會逼生小朋友
養小朋友開支大，現代生活多姿彩，又唔流行養兒防老，甚至連鄉下祠堂都好多年無返過去，生小朋友對好多夫婦嚟講唔係必要。但有啲奶奶總係有意無意間催逼，甚至暗示係新抱衰，唔肯生，仲不停講邊個邊個親戚朋友一結婚就生小朋友，真係好令人難受！
5. 男女平等
女仔一定要負責湊仔？煮飯、洗衫、掃地老公唔准幫手做？屋企人人有份，如果奶奶可以公平啲，唔再係「男主外、女主內」，多啲體諒新抱有幾忙（尤其係要返工嘅新抱），咁就真係好奶奶啦！仲有就係，生仔生女唔到新抱控制，最怕生女之後奶奶不停單單打打，話新抱個肚唔爭生氣，生唔到仔，真係激到紮紮跳！其實生仔也好，生女也好，唔好生支頂心杉出嚟就好好！
奶奶同新抱相處真係一門高深學問，夾得埋固然好，夾唔埋咪見少啲，同住的話唔係太過分，唔出聲咪算囉！（雖然有時真係好難頂）好過老公夾喺中間右左做人難。一句講晒：好奶奶？睇命水！
