2018-12-27

8K

【假日後遺】全職母親哪有一天在放假?

人人都放假,你估人人想放假?

各位放紅日嘅你,放完愉快嘅聖誕假期之後,再次坐返喺電腦前面開始工作,望住個月曆,數數手指再數埋腳趾,諗一諗,返多兩日又放假,有無少少覺得力不從心?有無輕輕覺得有啲痛苦?如果你以為自己係全世界最失落嘅一群,咁你就錯喇,因為塵世間仲有一種假期叫學校假期,一種喺紅日過後繼續熱烈奔放嘅假期。

而真正最受影響嘅人士,佢個名叫FTM(Full Time Mom),若果單單譯做「全職主婦」,個人認為真係完全表達唔到嗰份full time嘅飢渴感,因為講緊嘅full time,絕對係全天候OnCall∞小時。

可能你會覺得小朋友放多幾日假啫,有幾大問題呀?使唔使講到咁嚴重,但事實上可能係你完全想像唔到咁嚴重;就以鯊魚太個朋友為例,一個人湊住一大一細,平日個大仔返全日制幼稚園,都仲話可以趁個細嘅瞓咗做下家務,但面對長長嘅假期,對於只有一雙手嘅佢,真係頭都大埋。嗰頭煮完晏晝飯,都未話食完要抹手抹身抹枱,呢頭細嘅就要又換片,換完片又話要同大嘅陪玩陪讀,執完東就到西,鯊魚太淨係幻想到嗰個場面已經夠晒震撼!仲話要煮埋夜晚嗰餐、執靚間屋,等老公放工返嚟享受家庭之樂?呢個畫面真係童話過童話故事。

所以真心佩服每位FTM,而難得嘅係鯊魚太呢位朋友仲有手覆訊息,一個伴隨住身後甜蜜呼喚嘅語音訊息......加油呀,老友!

 

【編按:以上內容為作者之個人意見及立場】

相關文章

【劇場分享】 屋企最佳女偽人頒獎典禮

【收納教路】家中隱藏收納空間––櫃門篇

【新冠肺炎】口罩難求! 一文睇晒全港巿面供貨情況(不斷更新)

【放榜攻略】升學出路: 留港修讀基礎課程 一年內升讀知名倫敦大學!

緊貼新冠肺炎最新相關資訊