【媽媽成長路】長期靜音的手機

當我生咗和牛B之後，我部手機長期都係處於「靜音」狀態。部電話嘅鈴聲到底係點樣嘅呢? 我已經完全忘記咗，但行出街聽到有電話鈴聲就會馬上神經質，睇下係咪自己響。但，我部手機早已俾我毒啞咗，長期靜音mode。

身邊總有人會話我，成日打俾你都唔聽電話，通常鬧得最多o個個一定係我老公。

仲話「搵你救命就死得啦」。冇錯，叫救命嘅，你不如直接打999啦，咁會最好效率。

旁人一定唔會明點解我要教靜音，返工就話唔好騷擾到同事啫，平時都靜音部電話唔響有乜意思。但作為一個媽媽，我最驚電話喺唔適當嘅時候響起。

做媽媽真係好忙，照顧初生o個陣根本冇停手，換片、餵奶、泵奶，到BB瞓咗覺都仲有家務要做，做完淨返落嚟嘅時間先係媽媽嘅自由時間/ 休息時間。如果就喺呢個時候，手機響起，對一個媽媽嚟講揀直就係大懲罰。因為BB驚醒咗嘅話，又要唔知花幾多時間先可以成功哄睡/ 到下一輪睡覺時間。

所以由和牛B一出世之後，我就將部電話直接調教至靜音功能。

日子耐咗，我都習慣咗一部唔響嘅手機。

加上我頻密嘅影相習慣，就更加唔想影一張相響一下，有聲嘅話咁咪會俾人知，我瘋狂得好緊要?