2018-02-12

4.5K

【媽媽的拜年地雷】唔好咁對我嘅小朋友!

mama_angry

雖然話新年流流應該和氣生財,但每當親戚踩中呢幾個地雷,真係好嬲呀!

硬塞小朋友食嘢

可能你覺得小朋友有時飲吓汽水、食吓零食都冇相干。但係個個小朋友情況都唔同,有啲可能對某啲食物敏感、病咗戒緊口,旁人唔知得咁清楚。無啦啦勾起條癮,搞到小朋友扭要食唔食得嘅嘢,媽媽真係好難做!或者小朋友已經好飽,仲要迫佢食,唔好意思,我啲仔女唔係豬!

批評小朋友/同其他小朋友比較

「你今日著得咁醜樣嘅」、「你咁冇禮貌架」等等自以為幽默嘅批評,都會令媽媽憤怒!講出嚟時大家笑笑口都好,小朋友都未必識分,會唔開心,甚至以後抗拒去聚會場合。拜年時同場可能會有幾個小朋友,媽媽最討厭啲親戚拎佢哋互相比較!每個小朋友成長節奏都唔同,比較只會令小朋友失去自信。

同小朋友講父母壞話

想同小朋友親近有好多方法,唔一定要同人哋爸爸媽媽唱反調,例如「媽媽咁惡架」、「媽媽鬧人好衰呀可」,都會瞬間令媽媽一秒爆發!呢啲說話會影響親子之間嘅感情,況且父母係管教小朋友嘅角色,冇必要貪一時之快塑造佢哋成壞人嘅形象。

慫恿小朋友唔遵守規距

有時媽媽已經一早講明小朋友要遵守咩規矩,例如「食嘢前要洗手」,最怕多事嘅親戚會話唔需要,仲教小朋友一次半次唔緊要!媽媽辛苦同小朋友建立起嘅好習慣分分鐘就咁樣被破壞,真係好嬲!

講兒童不宜話題

有啲叔叔伯伯覺得喺小朋友面前講食煙、飲酒、甚至粗口嘅話題好搞笑。但就算小朋友唔理解,學識咗之後,將來可能會不自覺掛喺口邊!到時要糾正嘅咪又係日日對住佢嘅媽媽——我囉!

亂摸亂錫小朋友

雖然都知自己小朋友好得意,但好唔鐘意親戚咁熱情又攬又錫咁,唔熟嘅想嚇死佢咩。特別係仔女仲係小b嗰時,真係好驚親戚係咁亂摸亂錫bb!唔係個個咁自覺,確保自己清潔先掂bb,都唔知會唔會惹到咩細菌呀!

被追問幾時生多個

「冇兄弟姊妹好慘架」、「得XX自己一個咁寂寞」等說話,只會令到媽媽尷尬。唔生嘅原因可以有好多,同埋生出嚟又唔係唔使養!


相關文章

緊貼新冠肺炎最新相關資訊