一年又一年，唔經唔覺，湊住您都就快五年喇…
做媽媽，好忐忑，怕您唔大又唔捨得您大；
做媽媽，好犯賤，膊頭痛話您重，都係唔捨得唔抱您；
做媽媽，好神經，打您鬧您好兇狠，其實刀子嘴豆腐心，見到您喊我個心其實仲痛過陣痛；
做媽媽，好難過，希望您返學唔會喊唔會扭計，您獨立，您做到，媽媽又會痴痴咁喺門口裝裝貢，希望您會搵下我；
做媽媽，日日心情七上八落，希望您唔痴身，我認我自私，愛自由，希望早啲甩身，事實上媽媽好怕同您講拜拜。
記得您大約三歲時，我同您講生命無常，媽媽唔喺度您要照顧爸爸錫爸爸，您好似好懂事好認真咁話好，冇問題，跟住問我去邊，我就話唔知㗎，媽媽唔會一直陪住您，每個人都係，冇嘢係一定嘅，您話哦，我知道...
直到最近，您好可愛咁同我講叫我食少啲嘢，因為食少啲會大得慢啲，媽媽就唔會咁快死，媽媽，我唔捨得你死…
我哭了… 您對媽媽嘅愛，真係超越我嘅想像… 您呢句說話，好震撼…
不過，孩子，雖然呢個話題對您嚟講可能有負擔，但媽媽唔想您以為我會一直喺您身邊，我想您早啲明白生老病死呢一回事，呢種失去帶嚟嘅壓力，媽媽希望您會有個心理準備... 當然，我希望自己可以一直陪住您到我自然老死……
最後，都係嗰句，媽媽冇特別期望，只希望您健康平安快樂，知足常樂…
我愛您！
