2018-01-05

3.7K

【育兒】感謝婆婆照顧。讓我安心工作

Grandma_caregiver

香港地好多家庭都係兩公婆要外出工作,照顧小朋友呢部分就要交俾工人姐姐或者係老人家照顧。我哋都唔例外,大家唔好再問點解我唔自己湊。香港地生活高消費,樣樣都係錢,唔係話慳就可以生活到。住屋問題係最貴嘅部份,個個月都要捱貴租,我唔想老公獨力承擔、亦唔想因為無錢搞到成日鬧交,所以一齊努力工作都係為求過到生活、以及留啲儲備日後俾和牛B用。

當我生完和牛B復工後,和牛B嘅日常、照顧都係由婆婆代勞。感恩,我有一個好媽媽。佢由和牛B初生就開始幫我照顧佢,因為我同娘家住得遠,唔想大人細路都咁頻撲、辛苦。到而家為止,平日和牛B都係喺婆婆家過夜。要湊一個小朋友,已經夠辛苦,仲要幫我湊過夜。真係辛苦婆婆了。

選擇俾自己媽媽湊,我真係好安心。
而我亦唔想俾壓力婆婆,所以我返工嘅時間,好少會打電話/ whatsapp婆婆問和牛B做梗乜,有冇邊到唔妥之類。

婆婆間唔中都會影相俾我睇,幫我打打氣咁。
如果我全職湊和牛B,我相信和牛B一定係好瘦猛猛。
因為婆婆每一餐都好有心機煮、好有心機陪住佢食飯,作息定時。每日都有水果放送時段及滋補養生嘅湯水,所以和牛B由細個到而家,一直都肥肥白白。

而我選擇婆婆湊和牛B係因為,我由婆婆(媽媽)一手一腳湊大,我對上仲有哥哥同姐姐都係。所以我絕對相信,婆婆係有經驗、有能力、有耐性、有愛心照顧和牛B,所以我好安心。

而且婆婆係唔會寵壞和牛B,佢會幫我教導和牛B。和牛B做錯事/ 唔聽話嘅時候,婆婆會鬧。所以和牛B而家都會講「婆婆唔錫和牛B架,婆婆會鬧和牛B」

我聽到呢句,我當然會加以引導佢,我話佢知「婆婆好錫和牛B,只係和牛B曳,婆婆咪鬧你囉,媽咪都鬧你o架」佢聽完我講,佢自己都會笑

而都和牛B都好鍾意婆婆,放假日子,佢會話掛住婆婆,要睇下婆婆(視像)。

俾老人家湊,老人家都有兩類人。一種好似婆婆咁,真心感謝咁有心機。另一種就係過度寵孫,錫佢哋係o岩,但係如果咩都就晒小朋友,唔教導佢哋嘅話。佢扭計要食糖、飲汽水都俾佢,佢唔聽話曳你都就晒佢。久而久之,小霸王就係咁就誕生出嚟o架啦。
父母就真係會好激心…好憂心o架啦。
--------------------------------------------------
Facebook專頁: 和牛B嘅成長專頁

Instagramwagyubmami


【編按:以上內容為作者之個人意見及立場】

相關文章

緊貼新冠肺炎最新相關資訊