BB得意，個個都忍唔住聊佢玩吓都幾自豪架。不過路人甲乙丙都伸手嚟摸BB，做阿媽嘅好多時都會大驚失色。心知道人哋未必有惡意，喝住人又好似太緊張，但又唔想個個走嚟亂摸！最近就有網民就喺Forum講呢件事。綜合網民意見，對於呢種情況可以劃分到幾類媽媽：
Level 0 完全唔介意
原來都有媽媽唔介意！佢哋認為自己身上都有數不盡嘅細菌，都一樣照摸BB。細菌周圍都有，唔使特別防嘅，所以都唔會太介意其他人掂BB，只要佢唔係非常污糟就得喇。
咁我覺得又輕鬆得濟，雖然過度緊張係唔好，但BB嘅免疫力始終冇咁高，防一防好喎！
Level 1 介意但唔出聲
呢類媽媽會擔心其他人嘅觸摸會帶細菌畀BB，但都唔會好激烈咁拒絕嘅。如果有人做咗過激行為，或者突然有狗狗衝嚟鍚咗BB一下，都好可能一時反應唔切，唔識得發火，唯有事後清潔返。
其實媽媽真係介意嘅，都可以禮貌阻止，唔使怕尷尬～事後消毒都係一個辦法，不過最好就防範於未然喇。
Level 2 可以掂局部
有啲媽媽都歡迎陌生人同BB互動嘅，之不過唔畀人哋掂BB個頭、塊面或者對手仔，摸下腳仔都可以接受。佢哋覺得咁樣係一種禮儀同常識嚟，自己對其他BB都會係咁做。
Juicy媽最buy呢個！真係忍唔到手嘅，摸下腳仔咪囉，大家互相尊重呀嘛。
Level 3 只會畀女性掂
呢個情況發生喺BB女嘅阿媽身上比較多，上至婆婆嬸嬸，下至小姐妹妹，都唔太介意佢哋掂吓BB。不過，任何年齡層嘅男士都堅決拒絕，一條頭髮都唔掂得喇！所以佢哋遇到唔同人都會有唔同反應。
Level 99 咩人都唔好掂
最終極嘅緊張媽媽就唔想任何人掂BB！唔止路人，連親友都會抗拒。除非確認對方消毒過自己喇。呢類媽媽唔會怕尷尬，有人嘗試掂BB佢就會出聲，甚至拍開人哋隻手。
每個媽媽嘅界線都唔同，掂BB之前最好禮貌地問吓喇。如果喺路邊偶遇得意嘅BB，最好都係眼看手勿動喇。自己摸少吓唔使死，但萬一惹到唔知咩細菌畀BB就大鑊喇！
