2019-10-24

3.6K

媽媽育成記!5個當媽媽後改變的習慣,你中幾個?

生仔生女好影響媽媽買衫意欲?行街見到BB女裙子花款多,買衫畀囡囡多過買衫畀自己!其實生小朋友之後可止影響買衫習慣?根本就係成個生活習慣都改變哂!衣食住行都以囝囝囡囡行先,自己有咩需要?得閒先處理啦!立即Click睇睇JM們有咩熱話啦!

5個當媽媽後改變的習慣

1. 買衫買物品全部BB優先
未生小朋友之前行街Shopping買靚衫靚裙畀自己,仲要買埋飾品、手袋、高踭鞋襯到全套靚靚先出街;大肚之後買嘅都係BB衫仔同用品。以前入藥妝店係睇護膚化妝品,做媽媽之後睇尿片、奶粉、牙仔餅。如果生女就更加不得了!衫仔裙仔、小蝴蝶結頭帶、口水肩仔、可愛動動款、公主款…用一個月都唔會重覆!老公投訴:「我啲襪著到穿窿啦!」「你自己落街市買啦,廿蚊有4對!」

2. 少咗妝扮自己

做媽媽之前會買唔同嘅耳環、頸鏈、手鏈,仲要配埋唔同唇膏、胭脂、乾濕粉。不過,生小朋友之後,頭髮都唔得閒梳,習慣紮一條馬尾就算數。耳環頸鏈畀BB扯甩嘅機率係99%,從此打入冷宮。偶然親戚朋友食飯聚餐,都唔敢搽太多香香嘅化妝品,驚啲香味刺激到BB打乞嚏。想好似以前咁gel甲貼閃石?咪玩啦,一陣間仲要洗菜攪肉煮糊仔,gel甲gel到幾靚都花哂啦!

3. 告別小手袋,大大個背囊/媽媽袋孭出街

以前短裙迷你裙配小手袋,剛好放得落銀包、手機、唇膏就可以兩手揈揈行出街。生小朋友之後尿片、奶粉、BB替換衫仔褲仔、玩具、餐具,係媽媽袋常備物品。如果預計當日會出入冷氣地方,仲要帶件外套。單邊孭嘅媽媽袋嫌孭得辛苦?不如分兩袋,一般物品放背囊,孭個細斜孭袋放貴重物品。簡直就係郊遊look!

4. 高踭鞋變平底/波鞋
小朋友好黐身,明明識行識走都要扭抱,抱起個同包米一樣重嘅小朋友,仲想著3吋高斗零踭高踭鞋?肯定扭親多過食飯!如果係男BB,精力尤其無限,眼慢少少就唔知跑咗去邊,著波鞋追都未必追得切。去商場習慣睇波鞋,趁減價買多一兩對,追小朋友追得多好快就要換鞋。

5. 唔會出夜街
以前周末、大時大節同朋友玩到半夜三更,甚至玩通頂都係常態。生咗小朋友之後比灰姑娘還要灰姑娘,灰姑娘可以12點先喺party走,做媽媽之後,最遲9點要返到屋企,陪小朋友刷牙、講故仔、氹瞓覺。好彩的話氹到小朋友快快瞓著都仲有少少私人時間抖抖;唔好彩小朋友唔肯瞓,又或者半夜紮醒、瀨尿、嘔奶?同樣都係半夜三更先瞓,不過係被BB「玩」到瞓都無得瞓!

雖然由少女變做媽媽形象即時「師奶化」,不過見到小朋友懵懵懂懂嘅樣,即時sweet哂!

【編按:以上內容為作者之個人意見及立場】

相關文章

給妳8個新年【唔去拜年】嘅理由

在職全職媽媽辛苦了

全職媽媽變全職學生!尋自己的夢想!

【獨有的窩心時刻】BB長大得太快,媽媽未來得及細味!