當我陀B嘅時候，我都有啲少病，正所謂少病是福。之不過，食西藥，又驚有副作用對BB唔好，但食中藥又怕藥材唔乾淨唔適合……所以病親都係無咩藥啱食！
但係Touchwood，我陀B時算係好少病，病親都係瞓足一日就正常返。睇醫生，都係為求醫生畀張假紙我，唔返工係咁瞓，望住啲藥煉一煉仙。
其實由陀B、到而家餵人奶，講真，我一粒藥都未食過。就算個頭好痛，我都死忍爛忍，點知……
最近，悠悠爸又病咗……好唔好彩，明明背住悠悠爸嚟瞓覺、又無親熱，都被佢傳染咗……真係勁灰！仲要撞正短假期，有得霸住悠悠B嘅日子先來病，激死呀！
我忍左咁耐有病都唔食藥，唯獨是今次喉嚨痛，我真係有睇醫生食西藥嘅念頭。咁好啦，於是我踏大步咁去睇醫生，睇完。由於要照顧悠悠B嘅關係，我包藥都係放低咗，唔得閒食。好喇，到我可以坐低食藥，我先拎啲藥出黎再望一次，嗯！等我講一次我今次咩病先：我有喉嚨痛、有鼻水、有輕微咳。
醫生知我餵人奶，所以開左以下嘅藥給我：
一、止痛藥一包
注明：「需要時服」。我喉嚨又未痛到就嚟死，我諗唔需要食。
二、收鼻水藥一包
食咗會令人昏迷嘅藥，我要照顧悠悠，咁仲食唔食好？定係悠悠你自己照顧自己啦，媽咪瞓先。
三、咳藥水一支
我其實兩個鐘先可能咳一次，唔食啦。
四、喉糖
傳說中勁難食嘅嗰啲味
老老實實，我心目中，喉嚨痛應該要有一包消炎藥，但既然無嘅話，我就綜合咗我個人觀點後，我最終都係擺低咗包藥……又繼續煉仙！
由於，悠悠爸係超級病魔，所以佢放棄瞓大床嘅權利。所以悠悠B就填補左呢個床位，方便我照顧之餘，又可以溫韾一下！但留意，因為我都病，悠悠B都有少少傷風，但我唔想一己私慾令佢嘅病加劇，所以我有少少變態……我係戴住口罩瞓覺！唔知有無人好似我咁？個口咁臭焗住成晚，唔焗暈自己都偷笑！
但係，我煉仙咗一日，只靠不停飲水，竟然好返晒！但係超級病魔悠悠爸病情就有點反覆……唉！老公，你快啲好返啦！我同悠悠B下半世都要靠你養架……天父，請您快D賜悠悠爸一個強壯嘅Body啦！
陀住BB食藥又驚對BB唔好，生完餵人奶又驚食西藥對奶唔好，影響BB。做媽媽有時都幾慘，乜都要驚住就住。但係又咁講，真係好病就要食藥，只係我個人條頸比較硬，所以先至成日煉仙。
點都好，祝天下間嘅準媽媽、餵母乳嘅媽媽，身體健康！
備註：其實大肚婆同餵人奶嘅媽媽係有藥食，只不過藥力會較為輕微啲，希望我嘅硬頸，唔好為大家造成恐慌。
悠悠B: 爸爸媽媽你地要快啲好返，等悠悠運功先！媽哩媽空，病魔捐山窿！
