眨下間，細佬BB四個月大了。回想懷孕十個月，想跟各位媽媽分享我嘅懷孕經歷。
雖然第三胎，身邊朋友都話「有經驗，一定唔怕啦」。但，生小朋友喎，點會唔怕？正所謂，每位生產嘅媽媽，都好似係鬼門關兜完個圈（唔好意思，可能嚇親各位孕媽）。而且，上一胎已經係六年前，記憶濛糊。我就好似一個新手媽媽咁，從頭來過。
工作性質關係，我懷孕的第13週，便要由前線，暫時轉職到辦公室。呢樣，係我最最最唔習慣嘅事，一下子要返一至五，朝9晚5。對於我喜歡輪班，而且可以彈性調更來說，呢個轉變實在痛苦。但，無他的，習慣便是了。
頭兩個多月，懷孕反應唔算大，食慾正常，精神體力都好，冇暈冇嘔 (回想第一胎陀哥哥時，嘔到七彩，搭車一定攞住膠袋，行行下街又要衝去廁所嘔，試過忍唔住嘔落街上垃圾桶添)。不過，當踏入第12週，突然嘔咗第一次，接住日日嘔，餐餐嘔，嘔完全身無力。就係咁，我嘔到足足五個月。手袋長期放住一個膠袋，同埋梳打餅了。
呢五個月，雖然嘔得厲害，但胎兒大細正常。始終，媽咪身體結構係偉大的，無論嘔幾多，都一定會好好照料胎兒，將身體所剩嘅營養供給胎兒成長。
而我個肚肚，因為第三胎，肚皮較鬆，較早開始見肚。胎位比較低墜，醫生建議我少走動，避免胎兒持續陀得太低，會早產流產。聽完之後，有點擔心了，跟同時期嘅孕媽媽比較，我個肚看上去，都真係幾低。呢個時期，亦做咗好多測試，包括三個月嘅唐氏，同埋五個多月嘅結構超聲波，幸好都順利通過。
可惜，到孕中期，就陸續出現問題了。各項檢查都令我非常憂心。下次我再繼續跟大家分享。
