小JM就快十一個月，好快就會到小JM嘅一歲生日，我同爸爸都好期待。眼見小JM由BB漸漸慢慢成長，其實有時都會幾唔捨得，以前就任我地舞，而家就我地任佢舞咁……無時停。
小JM加固咗都有四個幾月啦，真係唔講唔知，原來為小朋友預備加固嘅用品都可以係一門學問，又要實用，又要好用，最緊要係「易用易洗」；而小朋友餐具／用具更不在話下，真係會越買越多……除咗小B們食野用嘅碗呀，湯匙呀，杯杯碟碟之外，你仲有無買以下嘅野來為小B預備加固呢？
不如，又睇下我為咗幫小JM加固買咗啲咩嘅用具同輔助器……
1. 「花兒」多功能燉煲
之前喺加固進階篇 (按此) 已經介紹過呢個燉煲（所以今次唔多講啦），最主要係有幾個原因：
．有煮BB粥嘅功能，除咗係燉盅，仲可以蒸煮、保溫，一物幾用
．最重要係價錢合理
2. Blender 食物攪拌器
小JM而家用緊嘅Blender係朋友送嘅，但真心好用，最重要真係易用又易洗，啱晒我呢個懶懶媽！原來B-Kitchen Blender係源於奧地利嘅廚具品牌來架，2015年先正式係香港有得出售。
咪睇佢細細盒咁以為好少野，其實呢個Blender集乾濕攪拌及水樽功能於一身架。呢個設計真係好方便，只要扭返個樽蓋就可帶出街飲，真係想幾時整新鮮果汁俾小B都無難度！
點樣乾濕攪拌？
其實係因為內附兩個唔同嘅器皿，一個係可以用來攪伴、榨汁兼具水樽功能，而另一個細啲嘅就可以用來攪碎乾果、果仁之類。
最重要、最特別嘅一樣野係：原來部機係無開關掣架！（咁你實會問我： 無掣點用呀？）部機嘅開關設計好特別，只要你將個器皿放好喺新機上，再向咗擰一擰就得架啦！想停？好易，向右再擰一擰就得！得咗！真係簡單到單手都用得，啱晒我呢個懶媽！
3. Kidsme 咬咬樂
Kidsme咬咬樂可以有效咁提高小B們對進食嘅興趣，仲可以俾小B嘗試到更多不同嘅食物；媽媽們仲可以完全好放心咁俾小JM自行拎住進食，而唔需要擔心小B會因此而哽親，可以話係媽媽們同小B們加固嘅恩物之一。
4. 食物餐墊
食物餐墊可以話係加固嘅另一個「必須品」！因為一張有吸附功能嘅食物餐墊係可以有效地防止小B們將食物或碗碟打翻。而我為小JM所添置嘅食物餐墊有兩款：ezpz Mini Mat同 T.T.嘅食物餐墊。
ezpz Mini Mat係結合咗食物餐墊及餐盤嘅設計，方便咗媽媽們清洗用具，節省時間。除咗咁，ezpz Mini Mat 仲有以下嘅優點添架：
．由矽膠材質製造，不易損毀，所以不易滋生黴菌
．適用於微波爐加熱，耐熱度達240度高溫
．可吸附喺任何平滑嘅表面，而不易被小B拎走或推翻
所以我都好放心俾小JM自行慢慢進食佢嘅茶點，而媽媽我就可以安坐一旁同時嘆茶。
5. 食物剪
食物剪，方便幫小B們剪細食物，以便進食。喺屋企有兩把食物剪，一把係Kidsme，另一把係Gino。
Kidsme 食物剪合三種功能於一身，可以剪、夾同弄磨食物，帶出街使用都一樣咁方便。
6. 食物儲存盒（冰粒盒）
或者你會問：小JM媽媽，你攪咩拎個冰兜來玩呀？我真係唔係玩，真係好認真架！唔知你地有無發覺，每次整野食俾小B要預備嘅野就好多，但係小B又唔係一次過食得晒喎，又唔知點處理好？
其實只要用冰粒盒就可以幫到你儲存小B嘅食物。只要將預備咗嘅食物／攪伴好嘅食物分開放入冰粒盒，到聽日再要煮個陣就只需要按份量／需要取出「食物粒」就得，省卻咗好多繁複嘅工序就自然多咗時間陪小B啦！
7. 外出餵食匙
相信之前有留意開我個Blog嘅媽媽都知道「外出餵食匙」係咩，真係可以話係餵食神器之一，有咗呢樣餵食器具就算小B們外出進食都好方便，又唔怕小B們咗扭右扭咁攪到倒瀉晒啲野食啦！
8. 旅行用食物袋連湯匙
旅行食物袋的確係方便咗，只要預先將食物放入袋中，到進食時幾樽蓋打開換成湯匙就可以使用。真係夠晒簡單快捷。如果你問我：食物湯匙好用啲定旅行食物袋好用啲？我會答你：各有各好。因為食物湯匙可以重用比較划算，但必須每次清洗乾淨！旅行食物袋都好用，因為可以盛載多啲食物，但因為係即棄嘅關係成本比較貴，但兩者都係旅行嘅必備佳品！
相關閱讀：
