喺抗疫期間，大家都會盡量避免出街食飯，所以一到星期六日，唔少人都鐘意邀請親朋戚友上屋企聚會，一齊傾下偈，玩下煮飯仔。但係！有種親友簡直係聚會克星！如果係朋友，仲可以永遠謝絕佢哋再上門。如果對方係姑仔、奶奶……真係眼淚在心裡流……
討論區熱話：怕唔怕朋友來到周圍摷野？
化身偵探周圍摷
無論到訪你屋企幾多次，對格局有幾熟悉都好。佢哋一如以往都係會好鐘意「參觀」你屋企，亦絕對唔會得到你同意後先開始探索。由門口開始，打開你鞋櫃好似去咗商場咁逐對鞋試，試完就當然散落一地啦；入到廚房，打開你個雪櫃，不問自取就逐包逐袋拆出嚟睇，然後是旦塞返入雪櫃，甚至有網友分享話佢哋親友會將可以放得入口嘅都摷哂出嚟食，兩頭鮑魚亦不能倖免。
超級浪費狂
有種親友嘅行為相當有趣，喺佢哋自己屋企就知慳識儉，識得節約用水、用電，事事都會用適當嘅份量，直頭係環保小先鋒，呢種生活態度本身好值得歌頌同學習。不過！呢種親友一旦去到你屋企作客，就會搖身一變成為大嘥鬼！
例如每一個佢哋參觀過嘅地方都開燈，參觀完都唔會幫手熄燈； 會為咗一滴清水，而抽五六張紙巾去抹，然後就掉落垃圾桶，此浪費行為一直到佢哋離開為止。喺你屋企過夜，可以開水沖涼沖足一個半鐘！沖完涼出嚟，裡面就好似去咗水立方咁，周圍濕漉漉⋯⋯ 嚟作客一日半日都唔緊要，偏偏佢哋好鐘意成日去你屋企大肆揮霍，用盡你所有物資！
更多文章：鎖匙俾奶奶＝自出自入？JM指：「寧願俾自己呀媽都唔會俾99」
最鐘意尋幽探祕
同周圍摷有點相似，不過戰場由廚房、客廳移師到主人房！愈私密嘅地方，佢哋愈鐘意去。雖然大家成日鐘意講「當自己屋企得喇」嘅客套說話，但有家教都知會有條底線。問都唔問就打開屋主嘅衣櫃或櫃桶，鐘意就試下條褲、心動就試下另一條裙、將首飾戴上身配搭，亦會拎屋主啲底衫褲出嚟鑒賞，甚至打開櫃桶睇你啲信件，真係老實不客氣。確實無論朋友又好、親戚又好，都要對屋主給予尊重，好多時一啲重要文件、貴重物品都會放喺主人房，一旦有任何損失，場面就會相當尷尬，記得喺參觀之前詢問一下，讓屋主留有私隱空間。
幫你試試大床
有種親友往往好鐘意未換衫未沖涼，未得到你同意就瞓落你張大床。十次有九次都係佢哋出完成日街，流咗一身臭汗之後，去到你屋企大呻非常之攰，然後就會大字型咁瞓落去。呢種行為除咗係無禮貌之餘，仲帶咗好多細菌上床，變相要洗一次床單……
在此呼籲，各位親朋好友高抬貴手！凡事問問屋主人，減低破壞力！
