如果要細數婆媳之間嘅矛盾，真係講到天黑都未講完。一山不能藏二虎，兩隻性格、喜好、習慣唔一樣嘅「老虎乸」住埋一齊， 一旦嘈起上嚟真係唔惹少，所以好多JM都希望搬出去自住，務求解決呢場世紀大難題。不過，搬咗出去真係會一天都光哂？！
錯喇，大家太睇少奶奶多年行走江湖嘅功力喇！各位記唔記得成為奶奶之前嘅佢哋，有一個所有媽媽都擁有必殺技：就喺奪命追魂CALL！ 住得遠咩？ 有手提電話都足以煩足你一日呀！
討論區熱話：奶奶成日問我有無煮飯
「你今日有無煮飯？無營養！」
呢條問題真喺奶奶嘅榜首問題，其實奶奶根本就只係想知你平時究竟煮啲咩俾佢個寶貝仔食。如果俾佢知道煮一菜一肉一飯，佢實話邊夠營養咖，食得咁少嘢。其實佢心入面，就已經有個「營養餐單」，唔係四餸一湯已經係營養不良。千奇！千奇！千奇！唔好俾佢知今晚叫外賣呀，你就會變虐待佢個仔。 討論區JM 就教落，記得答有煮！同埋煮得好豐富。
「今日去咗邊？去呢到做乜？」
今日去咗邊，呢條問題亦一定要答得好妥當，如果唔喺就會背上虐孫罪名。當你如實同奶奶表示會同老公小朋友去野餐，你好大機會會得到以下回答：「好地哋點解要坐地下食嘢？」、「出面咁曬仲喺地下坐。」總之，你去邊都唔會令佢最滿意。唔係教大家講大話，而喺可以講得婉轉啲，例如話帶小朋友去大自然吸下新鮮空氣，做下運動出下汗，以健康為理據，會比較容易接受。
奪命追魂CALL
最近更有JM分享自己奶奶同老公嘅來電經歷，談話內容總離不開「食飯未」、「飲湯未」、「有無出街」等問題，仲係每一日都不停重問，雖然唔係直接打俾媳婦，但老公每次聽完都會話好無奈好無聊，都咪話唔難搞！不過唔少網民認為奶奶係打畀老公嘅話，都只係因為奶奶太掛住個仔。
「天理輪流轉，到你做人奶奶或外母時就知！」
「我諗自己老咗可能都係咁, 學下體諒老人家。」
討論區熱話：奶奶的來電
始終養兒100歲，長憂99，子女唔喺身邊固然會掛心，不如大家喺老人家主動打電話關心前，都主動打電話俾佢地閒話家常，多一個朋友，好過多一個敵人呀。
