婆媳相處向來是一大學問，結婚後如果要與奶奶同住，夫妻關係分分鐘受到影響，甚至有不少人因為無法與奶奶相處而決定離婚。有港媽在網上發文，指同住的奶奶很喜歡管束和批評她，更不斷人身攻擊她，當寶寶出生後，雙方的矛盾愈演愈烈，令她萌生離婚的念頭，但她與老公的相處卻沒有問題，故不知該如何是好。
該名港媽在親子王國討論區以「因為奶奶，我好想離婚，好想過返自己的生活，算唔算自私？」為題發文，指她在婚後與奶奶同住，起初因為彼此的生活習慣不同已經不太開心，「奶奶屋企好亂，儲咗好多物品，只有一條好窄好窄的路可以行，我嘗試執拾清理，奶奶就會鬧我，叫我唔好多事」，到後來她懷孕加上疫情影響而在家工作，更經常受到管束，「奶奶話疫情禁止我外出，唔容許我食好多嘢，又話涼又話毒，懷孕的日子好似坐監咁」。
到寶寶出生後，奶奶起初答應幫忙照顧，後來卻嫌辛苦，讓港媽獨自照顧寶寶，但當奶奶在家時卻很喜歡挑剔她，「我一路湊B，奶奶都會搵嘢挑剔我，我每次開完奶要俾奶奶過手，一時話太熱一時話太凍，但奶溫度真係睇奶奶心情任佢講。由於奶奶不准我用洗衣機洗BB衫，我要半夜等BB瞓咗先得閒手洗，果時仲要好凍，奶奶吩咐我開桶水，之後佢會落好多洗衣液，搞到好多泡泡好難過水」。
後來港媽復工後，由於奶奶不願意照顧小朋友，所以她搬回娘家與父母同住，直至寶寶兩歲時再搬回奶奶家中，自此她不但要工作、做家務，更要滿足奶奶不同的要求，「奶奶話女人嫁咗入嚟就係要幫頭家手，柯屎唔好發出聲音。M到撕M巾要細細力，因為俾奶奶知道我來M 又有說話。奶奶成日話我唔識教好佢仔同孫，我點做都係諸多不滿，令我飽受精神壓力。」
《未來媽媽》劇照
此外，奶奶更經常對她作人身攻擊，批評她的學歷、衣著、出身等，而且奶奶十分有自信，「佢又讚自己皮膚好又叻又盛，如果我唔附和，奶奶就好唔高興鬧人，所以我只能視奶奶如仙女咁讚美，令我思想都扭曲埋。」
她曾經因為無法與奶奶相處而向老公提出離婚，坦言雖然與老公相處融洽，對方亦很愛錫她，但老公卻堅持要與奶奶同住，令她下定決心離開，想過自己的生活，但她卻就小朋友的撫養權等問題而煩惱，「主要係我同奶奶之間有問題，而去離婚，我係咪好自私？」
帖文引起熱議，不少網民都替她感到不值，但亦有人認為如果沒有經濟能力與老公搬離夫家，就不應該生育，「你明知同奶奶相處唔嚟，屋企環境亦唔適合養育小朋友，再生小朋友愈來愈辛苦係理所當然」、「俾2條路你老公揀，一係成家搬出去，唔可以俾鎖時奶奶，唔可以俾奶奶過夜，過來要預約唔可以直接衝上來。一家人每個星期會有一日陪奶奶，大時大節你都會識做。一係你哋離婚，個仔的撫養權歸你，你收入高，有娘家支援，而且小朋友仲細需要媽媽；相反你老公收入低，奶奶亦無能力照顧，應該無乜機會。」
