孭住沉重嘅媽媽袋，手抱一個熟睡嘅BB，腦海裡殘留啱先被親戚轟炸嘅一堆問題......呢個好可能係一個拜完年後攰到嘢都唔想講嘅新手媽媽。
帶初生BB去拜年，畀四大長老、其他親戚見吓新成員，大家固然會好開心。不過對新手媽媽嚟講，真係一個好大嘅挑戰。
先唔講BB要餵奶、換片，媽媽要孭住好多裝備出街，仲要推埋BB車。路程遠的話，上上落落加上中途唔知會有咩突發情況（扭計、塞車......），好可能未到已經身心俱疲。
拜年時人多，BB可能會受驚哭泣。亦可能有長輩熱情地請BB食嘢，聲稱一啲固體食物小B係食得。當然媽媽係最了解自己BB情況，一方面幫佢好好把關，一方面替佢接受來自各方親朋好友嘅寵愛，真係唔容易。
給小B媽媽們嘅溫馨提示：
- 唔好一出門口就包到實一實，令BB覺得唔舒服，可以帶定一兩件外套以備不時之需。
- 而家係流感高峰，媽媽們亦可以帶住一枝清毒液，唔怕BB被好多人掂沾染細菌病毒。
- 如果自己或BB狀態不佳，唔好勉強去拜年。雖然相聚機會難得，但勉強出門大家都辛苦，親友都應該要理解的。
- 帶BB 去拜年已經勇氣可嘉，對自己好啲，搭的士或者call車吧！
- 搵身邊嘅人幫忙，要知道一個人帶住BB搭車真係好吃力！
