2019-12-10

2.4K

偏心真係記一世!唔想仔女有童年陰影?呢4招幫到你!

「點樣可以唔偏心?」無論生咗兩個、三個定四個(甚至更多)小朋友,作為父母總係少不免要面對呢份功課。之但係,人體結構心臟本來就係偏埋一邊,試問邊有咁容易真正做到唔偏心?有啲人「自問做唔到唔偏心」,索性疊埋心水揚言「只會生一個」,但對於生多過一個嘅父母,又可以點樣做呢?有網民喺討論區開Post,一齊集思廣益睇可以點樣做好呢份「功課」,其中以下幾點好值得參考:

即刻Click入討論區一齊傾 >>>偏心真係好影響小朋友

即刻Click入討論區一齊傾 >>>請教生兩個或以上嘅JM - 點樣可以唔偏心?


1. 不斷提醒自己:「小朋友真係會記一世」


樓主話自己父母都有偏心,令佢自細已經唔係好開心,呢方面Juicy媽真係身同感受,好多父母口講話自己一視同仁,但做出嚟嘅嘢就另一回事,例如會成日稱讚弟弟多啲、對哥哥嚴苛啲,又或者會要求家姐畀大份啲家用、但妹妹就可以唔使畀等,呢啲例子真係聽埋聽埋成百幾二百樣!父母偏心,唔單只令仔女有童年陰影,到仔女大個咗,都仲會記得嚟自父母嘅無形傷害!所以各位父母想對做到唔偏心,首先真係要不斷提醒自己,有啲嘢如果冇好好正視,小朋友真係會記一世!

2. 多同每個小朋友單獨相處


無論幾忙、時間幾緊迫,都一定要分配時間同仔女單獨相處!其實小朋友之所以會覺得父母偏心,無非都係因為感受唔到足夠嘅愛、唔夠安全感,
所以家長不妨多啲同每個仔女製造獨處嘅時間,例如湊佢哋去補習、上興趣班、食嘢嘅時候,多啲傾密偈,各自分享小秘密!學JM話齋,要多啲灌輸:「只要你哋有需要,父母一定會出現!」


3. 大大力讚佢哋嘅優點


另一個令小朋友感到愛同滿足感嘅方法,就係大大力咁讚賞佢哋嘅優點!其實成日睇西方電影或者劇集嘅時候都留意到,西方啲小朋友即使只係做咗好小一件事,啲父母都會用勁浮誇嘅語氣大大力咁讚佢哋,氹到啲小朋友勁開心。
雖然香港父母要學到佢哋咁真係有啲難度,但如果能夠令小朋友感受到多啲愛同認同,又何樂而不為呢?
不過當然唔係乜都讚一餐,依然要賞罰分明,做得好就大大力讚,做錯咗就要罰,但事後最緊要同小朋友解釋清楚,罰佢唔係因為偏心邊個,而係因為是非對錯嘅問題。

4. 調節心態,令仔女覺得「媽咪錫晒我」!


好多家長覺得,要做到唔偏心,就要公平對待每一個,擁抱、陪瞓、陪讀、陪玩等時間,對每個仔女都要平均分配,買嘢都一定要公平,如果年齡差得遠或者性別唔同,就畀佢哋喺選擇範圍內自己揀。
不過,有JM提出,其實唔使諗「點樣公平」,而係諗點樣令小朋友覺得「媽咪錫晒我」,因為重點唔係公平,而係「適合」,同埋令小朋友感受到父母對佢嘅愛!
始終小朋友之間嘅年齡差距、性別、照顧者差異等,都好影響佢哋嘅安全感多少,如果有時格硬堅持「公平」,可能會弄巧反拙,所以最重要都係令小朋友感覺到父母滿滿愛,咁就唔會覺得父母偏心其他兄弟姊妹啦!

當小朋友感受到足夠嘅愛,先會識得去愛其他人,最緊要兩公婆同埋其他有份照顧小朋友嘅長輩或者工人姐姐都有共識,識得互相補位,避免偏向只關注其中一個小朋友而忽略咗其他小朋友,咁佢哋先可以開開心心咁成長!

【編按:以上內容為作者之個人意見及立場】

相關文章

【走進啤酒展覽館】帶孩子參觀Orion Happy Park!

從日本親子運動比賽學懂:「過程比結果重要。」

【筋肉寶寶養育記21M】我100%中了BB毒,各位爸媽又中了多少?

日本人教孩子飯前説的一句話!

緊貼新冠肺炎最新相關資訊