Trouble 2乜都話「唔要」，原來因為……

好多父母都覺得兩歲嘅小朋友好「麻煩」，以前咩事都聽爸爸媽媽講，一到兩歲就極力反抗， 經常鬧情緒，「唔要」成為咗佢哋嘅口頭禪，喊成為咗佢哋嘅必殺技。

面對Trouble 2，父母可以點做？

首先請家長回想自己同小朋友講嘢嘅時機同方式，係咪通常都係小朋友做緊一啲佢好鍾意嘅事嘅時候，家長就叫停佢哋？例如小朋友玩緊心愛嘅積木玩具，家長就話：「唔玩積木喇，要瞓覺喇！」

如果調返轉，媽媽煲緊劇，畀人叫去晾衫；又或者去爸爸打緊機，畀人叫去洗碗，同樣都會有反抗情緒！小朋友踏入兩歲，自我意識會愈嚟愈強，所以當遇着父母經常唔畀做呢樣、唔畀做嗰樣，所以難免會乜都話「唔要」、「唔好」。

父母落Order前事先頂告

大人做每件事之前或多或少都會做定計劃，所以內心有一定嘅心理準備，但兩歲嘅小朋友每日就係玩，亦未識得計劃，唔會知道原來已經夠鐘食飯、夠鐘瞓覺，所以，家長想小朋友聽話啲，不妨喺發出指令之前做定預告，例如「玩多五分鐘就要去洗手食飯喇」、「嗱，個鐘指住九點我哋就要返房瞓覺喇」，等小朋友有心理準備知道就嚟冇得玩。