2019-08-13

531

【開學系列】父母的學前焦顧 如何迎接幼稚園開學的第一日?

不經不覺嚟到8月中,數數手指開學日都即將來臨,係時候為鯊寶準備幼稚園開學事宜,回想去年呢個時候,全家總動員開始為鯊寶揀幼稚園,準備報名同面試,經歷等待放榜,感受失落再迎接驚喜,忽然真係想倒抽咗一口涼氣,偶爾諗起,其實都會反思 「會唔會只係自己太過緊張?」;經歷過報校同放榜,鯊魚太體會到喺鯊寶嘅成長路上,作為家長必先時刻提醒自己 「放鬆啲啦!」

 

更多閱讀:

【開學系列】 開學啦!學生證件相去哪裡影?

【開學系列】 15分鐘完成!返學簡易早餐清單!

幼稚園開學,係孩子踏入人生嘅重要一步,對於父母嚟講,真係既興奮又恐懼,至於要點樣為孩子準備?鯊魚太就反而覺得要先為自己作準備;原來要望住呢個身影走入校園,對於家長來說並唔係易事,呢個身影意味住孩子將會走向自己嘅世界,佢會開始有自己嘅朋友,有自己嘅思想同煩惱...「放手」還是紙上談兵嘅事!

咁到底父母同孩子要準備啲咩,先可以令返學嘅第一天輕鬆啲呢?

試試換個角度,別讓緊張吞噬

孩子要迎接幼稚園生活,父母覺得緊張都係好正常,之但係,你嘅緊張隨時直接影響到佢嘅情緒,令孩子認為返學就等於極緊張,所以作為家長最好都係梳理好自己情緒,除咗盡量避免喺孩子面前展露出緊張嘅情緒之餘,其實最治本嘅方法都係為真正掃走壞情緒,試諗下何必令一件開心事變成煩惱,忘記用眼球記錄孩子嘅成長呢?

另外,有唔少人都會為小朋友報讀興趣班,甚至係一啲學前分離班,漸進式為孩子走進個人群體生活,至於係咪一定需要?其實就要視乎孩子性格,亦唔需要急於一時間要佢學習同父母分離,妥善培養孩子安全感。

更多閱讀:【開學系列】揀興趣班要考慮啲咩?10個適合小朋友的兒童興趣班

如果無打算報讀相關教室,其實都仲有其他方法,例如喺街上見到其他哥哥姐姐返學嘅時候,可以興奮地同孩子講:「就快到你喇! 」,然後為佢準備小背囊,建立孩子對上學嘅期待感。

讓孩子熟習環境與人物

喺學校適應週嘅期間,可能有好多家長都會將心思放晒喺孩子身上,錯過咗同老師交流嘅機會;其實你都可以為孩子早一步建立人際,以友善態度同老師作簡單傾談,家長同老師溝通嘅過程,有助孩子認定對方就係父母嘅「朋友」,確認對方可信靠位置,令孩子減低緊張情緒。

建立孩子自信,以說話表達內心情緒

建立孩子自信心係非常重要嘅事,自信心有助佢哋喺上課時表達想法同情緒,學習社交技巧,當孩子勇於表達自己嘅時候,亦代表住佢哋對新環境開始建立安全感,幫助適應校園生活;除咗鼓勵同支持孩子以說話表達內心外,其實仲可以畀佢哋去決定一啲合符年齡嘅選項,例如食咩早餐或者小食,提升信心!

最後我相信,只要家長對孩子有信心,以愛作為佢哋最強後盾,孩子就必定可以跨過任何障礙,快樂地迎接人生每一個新階段!

【編按:以上內容為作者之個人意見及立場】

相關文章

開學3招助你與孩子對付「失魂魚」

【開學倒數】小朋友如何面對開學恐懼?

【開學在即】學生怕起爭執寧壓抑情緒 家長宜多聆聽子女心聲

【開學系列】揀興趣班要考慮啲咩?10個適合小朋友的兒童興趣班

緊貼新冠肺炎最新相關資訊