2018-10-12

3.4K

家長擺電話喺小朋友書包錄音……幼稚園老師談「怪獸家長」見聞

「怪獸家長」嘅故事真係日日新鮮日日新,除咗最「基本」嘅小朋友落地玩會勁緊張驚佢污糟、跌親之外,原來而家已經進化到要竊聽埋學校生活!

近日有班幼稚園老師上ViuTV節目《晚吹 - 又要威 又要戴頭盔》分享工作上遇到嘅奇聞,其中一位老師話試過有次檢查小朋友書包嘅時候,發現有個錄緊音嘅電話!

究竟係有幾擔心小朋友安全、幾唔信任學校老師先會咁樣做?幼稚園返學時間短則三個鐘,長則八個鐘,如果家長每日都要聽返啲錄音,咁都好唔得閒啫!


亦有家長好鍾意自打嘴巴,自己寵到個小朋友燶,幫佢孭書包、乜都幫佢拎,當幼稚園老師工人咁,想老師乜都幫個小朋友做,但轉個頭見到人哋啲小朋友樣樣都自己做,就走去質問老師:「你冇教我小朋友架咩?點解佢返屋企乜都唔肯自己做?」嘩大佬呀!好明顯唔係老師唔教,係家長做壞榜樣喎!

睇一睇啲留言,諸如此類嘅「怪獸」例子仲有好多好多,例如有家長質疑「點解我個仔冇獎嘅?」、「點解我小朋友會畀蚊咬?」、「點解我小朋友會成日病?係咪你哋冇教其他小朋友衞生常識?」

其實幼稚園老師真係好忙好多嘢做,每日除咗朝8晚5要照顧小朋友,仲要佈置學校、寫教學計劃、大時大節要寫活動計劃書,單係一個K3畢業禮,已經要約場地、印場刊、訂旅遊巴、安排家長、印門票、排舞、車戲服、做道具樣樣包辦,而且每照顧一個小朋友仲要認埋佢哋四、五個親人,爸爸媽媽爺爺嫲嫲公公婆婆工人姐姐都要認得,幼師們真係超人嚟,希望各位家長高抬貴手唔好成日留難佢哋啦!

圖片來源:擷取自ViuTV

 

【編按:以上內容為作者之個人意見及立場】

相關文章

緊貼新冠肺炎最新相關資訊