該如何清潔兒子的容易受傷地帶？

其實由兒子出世開始，媽媽們對於照顧兒子的下體會有不同的問題和疑惑，我次次見親醫生都問長問短，所以同大家分享一下：

一、 沖涼時，應該點幫BB洗陰莖呢？
幫BB換尿片或沖涼時，應該同時清洗陰莖和睪丸四周。戒片之後，就要開始教佢自己清潔。

二、 清洗時可以將包皮向後拉嗎？唔拉會否有尿留在入面呢？
不需要。因為嬰兒時期，包皮同陰莖尾部相連，到學行時先慢慢往後縮，直到讀幼稚園時完成。所以如果同BB沖涼時向後拉，就好容易受傷發炎。四歲之後先開始教他間唔中向後拉一下清洗就可以，不過小便時就一定要教他拉一下將尿排清。

三、 兒子鐘意時不時拉扯自己的陰莖玩，有無問題？
無問題，小朋友只是覺得好新奇、好得意，如果拉得太大力，佢就會即刻停的，畢竟他怕痛嘛。

四、 如果兒子在玩耍時撞親，應該怎處理？
雖然睪丸係好敏感嘅器官，但通常好少會嚴重到永久傷害。如在玩耍時撞傷，應先帶小朋友去隱蔽地方輕輕檢查一下，如果有劇痛、腫脹、流血、瘀傷甚至嘔吐，就要立即去急症室。

如果只是痛但沒有其他徵狀，就讓兒子坐低休息一會，看看痛楚有否舒緩，如果痛楚隨後開始減低，應該無事。但如果痛了一小時還覺得好痛，就應該帶去診所（街症或家庭醫生）檢查。

如果爸媽覺得無法判斷，就帶兒子去診所檢查比較穏陣。

當然，身為父母，有責任教導子女性器官不是玩具，不可以用來玩，亦都不可以同人分享啊！

image courtesy: Getty Images