日月魚對眼睛好，加上佢嘅價錢又唔係好貴，最重要係小小豬都好肯飲日月魚湯，咁我就當然係密密煲多啲，希望四眼豬嘅近視唔好加深(唉...佢依個年紀剛好係發育期，真係令我有點擔心呀)。
今次去入貨時同店主叔叔傾開，佢就教左我煲食個淮山杞子龍眼肉煲日月魚湯，既可以健脾胃，又有助明目，兩樣都好似幾啱小小豬(最好就係超易煲..哈哈)，所以就買齊材料煲靚湯俾我嘅豬大少飲啦~
日月魚可有醫治眼疾、明目、補腎益肝、養顏美髮功用。牠的營養成分很高，含豐富蛋白質、磷、鐵、碘及鈣質，所以對調節人體代謝平衡及促進生長都有一定幫助；淮山健脾開胃，其他好處為治療久泄久痢、肺氣虛燥、及消渴尿頻等症；杞子有滋養強壯又明目 ，對於視力減退、腰痛及糖尿病患者有功效；龍眼肉就有補益心脾，養血安神的功效。(網上資料)
日月魚一兩、杞子一湯匙、淮山八片、龍眼肉十粒及瘦肉約$40~
用清水浸日月魚至軟身(大約半小時)~
其他藥材就浸洗一陣~
瘦肉洗淨汆水~
煲內放約2.5L水，待水滾後加入所有材料~
再次滾起後，就用大火加蓋煲約15分鐘~
再轉慢火加蓋煲多1.5小時~
最後加入少少鹽調味，就可以飲啦~
雖然個湯以藥材為主，不過入口就完全冇藥材味，仲帶有少少日月魚嘅鮮甜味，所以豬大少都話好好飲呀！
溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！
