【幼兒食譜】小JM料理：清甜養生健體 紅菜頭甘筍粟米豬骨湯

早個零星期小JM先病完，誰知轉個頭小JM又撞傷，攪到呢排無咩胃口食野，每餐都只係食一半就停，媽媽真係擔心到一個點……

為咗吸引小JM嘅食慾，同幫小JM增強一下體質，今日媽媽決定煲個靚湯俾大家飲。不過而家天時咁熱，似乎煲啲清甜嘅湯水會比較吸引。

咁啱行經街市見到平時菜檔姨姨度有紅菜頭，所以媽媽就二話不說，一於煲「紅菜頭甘筍粟米豬骨湯」啦！

你咪睇紅菜頭成舊圓碌碌、紅卜卜，以為似蘿蔔咁簡單，其實紅菜頭係好有益架，營養纖維亦好高，醫學亦都證明咗對降低高血壓有幫助添架！

不如一齊了解下紅菜頭嘅好處啦！

紅菜頭嘅益處：

1. 有助增多腦部血液循環

2. 增強體力

3. 有助降低及穩定血壓

4. 有助通便

5. 具有抗氧化功效

6. 有抗癌作用

除咗以上幾點外，其實紅菜頭仲係一種低脂、高纖維嘅食物，紅菜頭含有豐富嘅胡蘿蔔素，但無膽固醇，而且低熱量同少澱粉質添！真係啱晒一家大細，亦都啱愛靚一族同各位靚媽、靚太們。

紅菜頭甘筍粟米豬骨湯

材料：

紅菜頭 一個
粟米 一條
甘筍 兩條
豬骨 適量
南北杏 適量
蜜棗 一粒

做法：

1. 先將紅菜頭、粟米、甘筍、豬骨洗淨；南北杏、蜜棗浸洗。

2. 紅菜頭、甘筍去皮，再將紅菜頭、甘筍、粟米切開備用。

3. 豬骨洗淨後，以滾水煮約 15-20 分鐘。 撈起沖水再備用。

4. 先預備一大煲水，煮滾後就將以上材料放入，待水滾後轉慢花煲一個鐘咗右即成！有需要可以因個人口味而加入適量嘅鹽，但因為紅菜頭本身係清甜嘅，所以無預先係煲度落鹽。

但好可惜我唔記我影碗湯，只知道一晚2大1小清晒成煲湯。而小JM仲食咗好多紅菜頭添，可能係因為甜甜地嘅關係啦。最後小JM仲自己拎住啲粟米來食，食到好津津有味咁。

＊ 其實唔落豬骨都一樣咁清甜，就連素食者都啱飲添！＊

媽媽可以加入其他嘅湯料配搭，變化出唔同口味嘅湯喔！