一到依啲轉天氣時份我就最鐘意煲虎乳靈芝，因為既可以預防傷風感冒，又可以强壯體質同埋增強抵抗力，打好左個底咁係就唔洗怕係學校容易受感染。
平日我都係用嚟煲湯多，早幾日去藥材店入貨時，言談間店主叔叔又塞錢入我袋，教我用虎乳靈芝加雪梨乾一齊煲，就可以既清潤又強肺(最好就係時間又唔需要太耐)，所以就即刻執份材料又試下煲啦~
虎乳靈芝對補益肺氣，增强肺的功能有一定療效，不過病緊就唔好飲住，好番先飲；雪梨乾具生津潤燥、清熱化痰之功效，雪梨本身屬寒涼之物，但雪梨乾經過烤焗後反而潤而不寒；無花果具有滋陰健脾，益胃潤腸，清熱解毒及消腫止血；南北杏則有潤肺止咳功效。(網上資料)
虎乳靈芝1/3両、雪梨乾1両、無花果3粒、南北杏1湯匙~
將所有材料浸洗一陣~
煲內放約1.5L水，然後隨水加入所有材料~
待滾起後，用大火加蓋煲約10分鐘~
然後轉慢火加蓋煲45分鐘~
熄火焗多15分鐘，之後就飲得啦~
煲出嚟其實同普通雪梨茶嘅分別唔大，甜甜地又易入口，小小豬都話好好飲，好快就已經KO晒一大杯啦！
溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！
