【清甜清熱】竹蔗茅根馬蹄蘋果湯

平時竹蔗茅根馬蹄水我當涼茶煲俾小小豬飲，今次肥媽教加蘋果同豬肉當湯飲，又好似幾得意咁，唔知甜甜地嘅竹蔗茅根變成湯個味又係點呢？所以就去買齊材料煲下啦~

同平時煲涼茶嘅材料差唔多，只係加左蘋果、果皮同豬肉，咁就變成一個靚湯啦！
材料就需要以下幾樣：竹蔗兩支、茅根一札、馬蹄約八粒、蘋果三個、果皮一小片及豬肉眼約$40~

再提一提大家，係洗蘋果前會用刀刮一圈，刮走那一層果蠟，咁連皮煲湯時就可以飲得安心啲啦~

豬肉眼洗淨汆水；果皮浸軟刮瓤；蘋果留皮去芯切塊；馬蹄洗淨去皮~

係雜貨店買竹蔗可以請店員幫忙破開幾段，回家後只需要洗淨開半；茅根洗淨瀝乾

煲內放約4L水，然後隨水加入果皮

待滾起後，加入其他材料

先用大火加蓋煲約30分鐘

再轉慢火加蓋煲多1小時，最後加少少鹽就飲得啦

其實當初都有丁點擔心個湯會又咸又甜個味會怪怪，不過入口又真係有驚喜。啖湯好清甜，既有好香嘅竹蔗味，又有點點蘋果香，總次就係好好飲，小小豬仲不停叫添飲呀！