小JM料理台。消暑湯水。老少都啱飲!沙葛豬骨湯

作者:傑。斯與晴

2019-07-30 552


夏天熱辣辣,又唔想成日都煲冬瓜湯,仲有咩湯水可以煲?

我就揀咗用「沙葛」來煲湯!你又有無飲過?
其實沙葛唔止可以用來煲湯,仲可以用來炒菜添架!
而今次我用「沙葛」煲嘅就係紅蘿蔔花生眉豆沙葛豬骨湯。

沙葛簡介:
沙葛,味甘、性涼、止渴、通便而且具解酒功效,所以於中醫而言係有食療作用。
而西醫研究指出沙葛有降血脂、血糖和預治心臟病方面的功效架。

唔單止咁,沙葛仲有清熱消暑、生津潤燥嘅效用,夏天同初秋都啱食!

注意:
沙葛嘅種子及莖葉係有毒架,所以唔適宜食用!

紅蘿蔔花生眉豆沙葛瘦肉湯

材料︰

紅蘿蔔 一條
花生
眉豆
沙葛
陳皮  一至兩角
生薑  數片
豬骨

做法︰

1.) 花生、眉豆及陳皮浸洗,備用。

2.) 將陳皮刮囊。

3.) 將豬骨汆水,備用。

4.) 將沙葛去皮及切厚片。

5.) 紅蘿蔔刨皮後切厚片

6.) 預先煲滾水,將豬骨、沙葛、紅蘿蔔、花生及眉豆放入

7.) 最後加入將果皮及薑片,並以大火煲滾再轉細火煲兩小時即成。

沙葛煲完湯依然爽甜味美,小JM都好鍾意食!你睇佢幾滿足!