早幾日係網上見有朋友仔分享左自家醃製嘅蜜糖香茅雞翼，睇落又真係好簡單，加上屋企仲有一份香茅係度，所以我又跟風整埋一份，估唔到真係超惹味，好味到停唔到口呀
為了減輕媽媽負擔，以下收錄了：100款食譜—媽媽入廚秘笈 主食、湯品、茶點，而且會不斷更新！讓媽媽們儲藏好這份「入廚秘笈」，可以隨時隨地「發功」，想知更多的健康食譜資訊，請按 #幼兒食譜 
由於係自家醃製，所以就要預早一晚將啲雞翼醃左先。材料看似係好多，不過大部分都係屋企現有嘅，所以要額外買嘅都唔算多。 雞翼兩磅、香茅4-5枝、蒜頭1粒、薑1小舊、魚露2湯匙、豉油1湯匙、黃糖1湯匙(可用普通砂糖代替)、紹酒半湯匙、黑椒適量、泰式青檸1個 雞翼溶雪後洗乾淨備用
香茅拍一下再切段 
將少許香茅、薑及蒜頭切碎，我就好貪快地用左攪拌機將三種材料整成蓉 
將所有材料(混蓉、香茅、魚露、豉油、黃糖、紹酒及黑椒)加到雞翼後撈均 
最後加入埋青檸汁 
再撈均後，等醃過夜就可以準備拎去光波。係醃嘅過程如果可以的話，間中就拎出嚟反一反咁撈均啲雞翼，咁啲雞翼味道就會均勻啲呀 
醃左一晚就可以開始光波，用高架預熱光波爐240度3分鐘，然後加入雞翼光波8分鐘(入光波爐前盡量撥走啲香茅段，如果唔係就會好似燶，黑卒卒出嚟唔靚呀) 
之後兩邊都掃上蜜糖，最後反轉再光波5分鐘 
熱辣辣新鮮出爐嘅蜜糖香茅雞翼就食得啦 
絕對唔係自己讚自己，啲雞翼真係醃得好入味，好香嘅香茅味再帶有少少青檸嘅酸酸甜甜味，睇我家兩位老細密密食，就知係好食到唔識形容啦，小小豬仲一個人都食左我4大隻呀...哈哈哈 自己醃當然係比買現成醃好嘅嚟得更有成功感，老公咬第一啖時都已經話好得，仲叫我整定多啲係屋企，咁幾時都可以食到好味雞翼啦！ 其實除左光波之外，都可以用煎、焗或BBQ依啲方法嚟煮雞翼，所以唔怕食唔到咁好味嘅自家醃製雞翼呀！
