自家廚房：荷葉冬瓜水

今日去街市買餸時都只係打算懶懶地滾個冬瓜湯就當一個餸，但後來發現原來今日係小暑，所以最後我就改為煲荷葉冬瓜水，等我家兩位老細消消暑啦

用料就有鮮荷葉半塊、冬瓜1斤及赤小豆、扁豆、生薏米、眉豆各1兩

首先洗乾淨冬瓜切件，切細粒啲方便出味呀，仲有要連冬瓜皮、瓜瓤和瓜仁一齊煲

所有豆豆浸洗備用

半塊荷葉係菜檔買冬瓜送嘅，所以雖然個外表就唔係咁靚，不過唔好浪費嘛。荷葉洗乾淨之後，剪成細細塊備用

除荷葉外，當所有材料全部放入1.5公升水煲內

待水滾後轉用細火煲30分鐘

最後放入荷葉後再用大火煲多十分鐘

煲好之後待涼入樽，咁就可以飲得啦

飲落好重冬瓜味，但又唔會有嗰一陣藥材味，所以小小豬都好肯飲，仲唔洗我提就好快飲晒一大杯啦！

依個荷葉冬瓜水有健脾益氣，消暑袪濕功效，無論老幼都適合飲用。所以就算唔係小暑，係依個炎炎夏天煲多啲嚟飲，消消暑都唔錯呀！

溫馨提示：
- 嚟緊7月23日就係大暑，可以考慮試下煲依個冬瓜水嚟消暑啦！
- 藥材依方面都係好因應個人體質，所以記得煲之前了解下自己，或者問下相熟藥材店職員，依個藥方啱唔啱飲呀！