自家廚房：龍脷葉石黃皮青欖止咳湯

繼老公咳左幾日之後，終於輪到我了，由於我都係初起，所以就打算去買材料煲止咳湯食，希望可以湯到病除。

原本都只係打算煲之前都有成效嘅青欖桔餅湯，不過雜貨店店主教我加埋龍脷葉及石黃皮一齊煲，效用會更加好，見啲材料又唔貴，所以就一試啦~

基本上大部分材料都可以係濕貨店或山草藥店有售，有部分街市花檔都會可以買到，所以都唔難買呀！

材料就有瘦肉約$40、龍脷葉一両、石黃皮十粒、青欖十粒、桔餅2個、果皮1塊、南北杏少許

桔餅切碎，青欖及石黃皮要用刀背拍一拍，等可以係煲時更加出味

龍脷葉及南北杏洗淨，果皮浸軟刮囊，豬肉汆水備用

煲內加入約3.5L水，然後加入先果皮

待水滾後將所有材料加入

水滾後，加蓋轉小火煲1.5小時

最後加少少鹽調味，就飲得啦

味道就帶點甘甘甜甜，比起只落青欖桔餅，就多左一份龍脷葉嘅味道，所以都尚算唔錯。

止咳功效又如何呢？學老公話...你估係先丹，一飲就可以止咳。不過我即晚都飲左三大碗(咁又真係幾好飲嘛)，咳就都仍然係有，不過飲完又真係嚨喉舒服左，起碼減少了痕痕癢癢的感覺。

其實我今次都係買左兩份材料，等我過左幾日再煲多次，希望可以完全止咳啦....因為我真係勁唔鐘意飲黑卒卒嘅咳藥水呀了！