自家製作：蘋果龍脷葉茶

今次煲左清潤的蘋果龍脷葉茶。

材料：蘋果三個、龍脷葉四兩、蜜棗五粒、南北杏少許

上次我煲完蘋果雪梨水之後，小豬媽問我有無係煲蘋果之前先用刀刮走蘋果皮上的果蠟？

原來蘋果(尤其係蛇果)通常會打一層果蠟，打蠟可以保持水果新鮮，且能防範病蟲害。不過呢啲果蠟都唔係天然嘢，所以都唔好食落肚，最好就係刮走佢。

經小豬媽提醒，我今次係洗蘋果前用刀刮了一圈後發現，發現真係有啲好似頭皮屑嘅白色粉末，唔通依啲就係果蠟？睇見都真係有啲恐怖，下次如果要連皮食蘋果時，一定要加多一個步驟呀。

蘋果刮去果蠟果蠟後去芯切開。

龍脷葉先用浸半個鐘後，瀝亁備用。

約1.5公升凍水加入南北杏。

水滾後將其他材料加入滾水中。

再滾後收細火煲一小時左右即成。

煲好之後待涼入樽放在雪櫃，咁就可以飲得啦。

平日我煲嘅涼茶大肥豬爸爸都好少主動讚，不過今次飲左一啖之後，就話個味幾特別，幾好飲咁話！哈哈...煮嘢食莫過於聽到讚賞，等我下次再加埋豬肉煲龍脷葉愛心湯先得！

唔好睇少細細塊嘅龍脷葉，原來佢嘅功效好利害，可以止痰化咳、嗽哮喘、肺熱咳嗽、急性支氣管炎、上呼吸道炎及支氣管哮喘之用。煲多啲嚟飲，可以同身體打打底！