今晚我地有好味宵夜，就係小小豬為我地整嘅光波芝士焗蘑菇呀。
其實小小豬係因為睇左佢本食譜之後，見到啲焗蘑菇佢就話想食，仲嘈左我幾日要整，結果今日係街市終於見到啲蘑菇，所以就買少少嚟俾佢試下。
原本打算係今晚晚餐加餸，不過最後我地都係決定等我地晚飯後慢慢整，唔洗咁趕嘛！
首先就同啲蘑菇洗白白
然後剪走個蘑菇蒂
用刀括去少少啲蘑菇毛毛(其實我唔知要唔要括，不過好似括左安心啲食呀)
整好晒啲蘑菇就可以開始加啲餸上去，首先將加啲火腿絲
再加多啲啲蟹柳絲
最後就加啲芝士
就可以拎去光波爐焗啦
用200度焗8分鐘
出爐啦，其實個賣相都唔錯呀
平時叫小小豬食蘑菇，佢都係十萬個不願意，但可能係佢自己親手整關係，依隻豬仔食得特別快，幾啖就食晒落肚呀
可能我平日訓練有功，依家小小豬整嘢食都真係似模似樣，整嘅時候都算佢專心啦。
不過我要繼續培養小小豬整嘢食同鐘意入廚，因為學朋友K話，識入廚嘅男仔係好吸引，咁就等我幫小小豬成為筍盤啦...哈哈哈！
