親子廚房：棉花紫薯蓉

依排真係紫薯大熱(或者其實係我後知後覺，係HIT左好耐)，所以我又跟風同小小豬整個棉花紫薯蓉嚟做下午茶，開心親子下兼食滿足一下為食嘅兩母子啦

為了減輕媽媽負擔，以下收錄了：100款食譜—媽媽入廚秘笈　主食、湯品、茶點，而且會不斷更新！讓媽媽們儲藏好這份「入廚秘笈」，可以隨時隨地「發功」，想知更多的健康食譜資訊，請按  #幼兒食譜

簡單兩條紫薯、淡忌廉同埋粒粒棉花糖就做到啦

首先就洗乾淨紫薯

然後紫薯放入光波爐以220℃焗40分鐘。如果冇光波爐就可以將紫薯隔水蒸約20分鐘

稍涼後就可以同紫薯去皮啦

趁微溫時就可以開始整成紫薯蓉，今次我就用左一個既方便又快捷嘅辨法，就係將紫薯放入密實袋內，之後就用木棒碌..碌..碌，咁就會話咁快變成紫薯蓉啦

將紫薯蓉放入大碗內，可以先試下味，如果有需要可以加入少少砂糖。不過我自己就覺得個紫薯幾甜，所以我今次冇加糖。

分幾次逐少加入淡忌廉，然後慢慢攪拌，直至自己喜歡滑度。我地慢慢加...慢慢攪，用左大約半盒淡忌廉啦

將已經攪好嘅紫薯蓉倒入可入爐嘅小杯內~

然後到左小小豬最期待嘅過程，就係將棉花糖放於面上~

再放入光波爐，用180度光波6分鐘或至金黃(要小心看著棉花糖，好易濃呀)

YEAH....經過小小豬一輪嘅努力，終於可以食得啦~

焗好左嘅棉花糖就會軟棉棉，配埋個甜甜嘅紫薯一齊食，個口感同味覺都真係幾特別，都唔錯幾好食呀

不過就一定要即焗即食，因為啲棉花糖一凍左就會收縮，之後就會變硬，會影響個口感，咁就會扣少少分啦！