我深信係因為遺傳嘅關係，從細到大定咩都絕對唔係嗰種坐定定嘅小朋友，雖然唔算特別乖，但托賴總算講得聽，而且有一樣嘢都確實幾抵讚，就係作為一個男子漢（呢句其實唔關事） 定咩絕對係「拎得起，放得低」，暫時都無話要扭計買玩具，或者玩到唔願走......
不過凡事都有「第一次」，話說上星期，定咩首次踏足宜家傢俬，面對不同嘅「屋企」場境，已經令佢興奮之極，去到玩具部更加係不得了，山咁高嘅玩具架，擺滿咗佢摯愛嘅動物系列公仔，有大象又有獅子，佢嗰刻嘅喜悅，真係單單睇個背影已經感受到，之不過鍾意還鍾意，要離開嘅時候，佢都係每隻攬下就自己同動物們講Bye-bye，作為阿媽見到呢個情境，真係表示讚嘆！
但呢個只係故事嘅上集，當定咩躍身到下層，遇到嗰架同佢天生一對，身型比例fit到漏嘅購買車之後，佢仿彿變咗另一個人，開始好似大家淘寶一樣，不斷將各樣家品放入購買車，當中包括：刀叉套裝、磨刀器，場面就好似嬴咗唔知咩大獎，限時放到幾多落去就係屬於佢咁，而我就只有尾隨不斷將家品放返原位，直至佢遇到一個煮食鏟同彩色掛勾，呢兩樣嘢竟然令佢陷入兩難...
基於定咩婆婆覺得兩樣都（或者有可能）有需要，所以賦予咗定咩選擇嘅權力，而最後經過長達10秒嘅深思熟慮，佢揀咗個平實嘅鏟；過咗兩日定咩婆婆仲大讚好用；忽然間諗起，平日定咩最鍾意就係整泥膠牛丸，莫非佢真係咁有眼光！？
唔知阿囝將來會唔會係住家暖男呢？
